sabato 31 marzo 2012

QUALUNQUEMENTE FRIULANI

Intal mês di març dal 2010 il consei comunâl di Palaçûl al faseve buine une mozion cuintri la omofobie e la transfobie presentade di bande dal Partît Democratic. Il document al passave cun largje maiorance (ricuardìn dome lis astensions di trê components dal grup di Forza Italia, e in particolâr che une vore pesante dal assessôr aes politichis sociâls) e cul vôt favorevul dal sindic Bordin. Viodût che in chel document, preseât  ancje di bande di ArciLesbica e ArciGay, si declarave la "necessitât di acetâ lis diferencis" e in particolâr si cjapave lis distancis "dai pôcs facinorôs, che, semenant la intolerance, e impedissin il progrès de societât  taliane" al ven spontani domandâi a Bordin ce che al faseve in bande di Fontanini  e di Calderoli (i gay non sono friulani tipici e non sono una famiglia). Un tic di coerence no, eh? Vergognaisi.

CONVOCÂT IL COORDENAMENT DAL PD DE BASSE PAR MIERCUS AI 4 DI AVRÎL A DAEL

Fulvio Tomasin al à convocât il coordenament dal Partît Democratic de Basse Furlane, adun cui aministradôrs dal teritori, par miercus ai 4 di avrîl 2012, a lis 20.30, alì de sale civiche di Dael in Vie Battisti n.25. Inte riunion si discutarà dal progjet di un gnûf centri comerciâl a Dael-Visc.

domenica 25 marzo 2012

ADEUS TONI


23/09/1943 - 25/03/2012

"Cumò Tristan al è strac pardabon, nol à plui flât, si lu sint, al varès voie di durmî, ma no il sium curt di une iniezion, a lunc, come che al a di jessi lunc il sium cal compense la fature di vê vivût"
Antonio Tabucchi

NUNCA MAS

sabato 24 marzo 2012

AQUILEE 2/4/2012 - VIERS LA CONFERENCE PROGRAMATICHE PAL 2013

La segretarie regjonâl Serracchiani e il coordenadôr pe conference programatiche Enzo Martines e invidin i segretaris e i diretîfs dai circui, lis assembleis, lis direzions e lis segretaris provinciâls e regjonâls al secont incuintri pe presentazion dai documents de conference programatiche dal Pd pal 2013 elaborâts di bande dai forum e za passâts in direzion regjonâl. Apontament par lunis ai 2 di avrîl 2012, a lis 18.30, alì de sale consiliâr dal Comun di Aquilee. Il program dai lavôrs al proviôt la introduzion di Debora Serracchiani, la esposizion di une premesse politiche ai documents di bande di Enzo Martines e un struc des propuestis afidât ai referents dai grups di lavôr: Rita Maffei pe culture, Renata Brovedani pe imigrazion e Laura Fasiolo pe scuele.

martedì 20 marzo 2012

JUSTIZIE E LIBERTÂT: INIZIATIVE PUBLICHE SUL TEME DAI ZOVINS E DAL LAVÔR A UDIN

Il Circul Justizie e Libertât di Udin us invide a partecipâ al incuintri “Ocupazion pai zovins: struments e prospetivis” che si davuelzarà joibe ai 22 di març a lis 18.30, alì de Sale Tomadini in Vie Tomadini 30 a Udin. Relazion de prof.re Valeria Filì de Universitât di Udin.

venerdì 16 marzo 2012

CUNVIGNE AL CENTRI BALDUCCI: IL DIRIT AE PROTEZION. CUÂL FUTÛR PAL DIRIT DI ASÎL IN ITALIE?

Il Centri Ernesto Balducci e la Rêt pai Dirits di Citadinance dal Friûl – Vignesie Julie e invidin a partecipâ al incuintri public "IL DIRIT AE PROTEZION. Cuâl futûr pal dirit di asîl in Italie?" che si davuelzarà lunis ai 19 di març 2011, a lis 20.30, alì dal
Auditorium dal Centri Balducci a Çuian.
Chel di asîl al è un dirit fondamentâl de persone, stabilît di bande dal articul 10 de Costituzion. Furnî, protezion a cui che al scjampe di persecuzions, conflits e violencis coletivis al è un oblic juridic e etic de Republiche. Cun dut che la Italie di cualchi an a cheste bande e sedi deventade un paîs di destinazion dai rifugjâts e no plui dome un paîs di transit, lis politichis publichis no son sigurementri adeguadis ae situazion.
Il stes dirit di asîl al reste un teme pôc cognossût di gran part de opinion publiche ma ancje dal mont de culture e di chel de politiche. Daspò de sentence de Cort europeane pai dirits dal om che e condane cun durece l’Italie par vê parât indûr i sfolâts che e rivavin de Libie e dopo la fin de cussì clamade “emergjence Nord-Afriche” al è necessari vierzi une gnove pagjine dal dirit di asîl in Italie. In ocasion de presentazion de ricercje “Il dirit ae protezion” un dai prins studis che al cjape in esam il stât dal sisteme asîl in Italie intai ultins agns, discutin des prospetivis dal dirit di asîl intal nestri Paîs cun:
Furio Honsell - Sindic di Udin
Guglielmo Pitzalis -  Miedi, referent dal GrIS Fvg de S.I.M.M. (Societât Taliane di Medisine des Migrazions)
Silvia De Lotto - Associazion Nuovi Cittadini Onlus, ent gjestôr SPRAR di Udin e coordenadore de rêt regjonâl “Crocicchio-Voikrucigo”
Pietro Paviotti - Sindic di Çarvignan e referent ANCI regjonâl dal Friûl Vignesie Julie
Tamara Amadio - Avocat, CIR (Consei Talian pai rifugjâts)
Gianfranco Schiavone - Component dal diretîf nazionâl A.S.G.I. (Associazion Studis Juridics su la Imigrazion) e coordenadôr sientific de ricercje “Il dirit ae protezion”
Introduzion e coordenament par cure di Pierlugi Di Piazza, Centri Balducci

PRESENTAZION DE CANDIDATURE DI LUCA FANOTTO A SINDIC DI LIGNAN

Cheste matine e je stade presentade uficialmentri la candidature a sindic di Lignan di Luca Fanotto. Lu sostignarà ancje la liste civiche di centri çampe Comunità Lignano.

mercoledì 14 marzo 2012

CUNVIGNE DI LEGAMBIENTE A MONFALCON: GRANDIS OPARIS PAR FÂ SU LIS OPARIS O BEN PAR INVIÂ UNE MOBILITÂT SOSTIGNIBILE DI PERSONIS E MARCJANZIIS?

Vinars ai 16 di març 2012, a lis 18.00 alì de sale Conferencis de Biblioteche Comunâl di Vie Cerini a Monfalcon o sês invidâts a partecipâ al incuintri public: "Grandis oparis par fâ su lis oparis o ben par inviâ une mobilitât sostignibile di personis e marcjanziis? De TAV in Val di Sûse al Plan de Zonte Regjonâl dal Friûl–Vignesie Julie pes infrastruturis di traspuart, de mobilitât des marcjanziis e de logjistiche"
Program:
Salût dal Sindic di Monfalcon Silvia Altran
Intervents di Vanda Bonardo, za presidente regjonâl di Legambiente Piemont, Elia Mioni, president regjonâl di Legambiente FVG, Andrea Wehrenfennig, Circul Legambiente Verdazzurro di Triest, Rudy Fumolo, Circul Legambiente Green Gang di Monfalcon
Dibatit

FONDAZION AQUILEE, MODEL DI GUVIER E PARTECIPAZION DAL TERITORI

Il Circul dal Pd di Aquilee us invide a partecipâ ae assemblee publiche "Fondazion Aquilee, model di guvier e partecipazion dal teritori" che si davuelzarà joibe ai 15 di març 2012, a lis 20.15, inte sale consiliâr di Place Garibaldi 7 a Aquilee.
Intervents di Alviano Scarel, president de Fondazion Aquilee e Franco Nicoletti, president dal comitât di “Agenda 21” de Fondazion Aquilee.

LA VÔS DAL FRIÛL A STRASBURC

La funzion dai mieçs di comunicazion dilunc de strade de inclusion sociâl dai zovins rifugjâts: scoltìn lis lôr vôs. La vôs dal Friûl a Strasburc e sarà chê di Daniel Samba.
Dai 4 ai 10 di Març si davuelç a Strasburc, alì dal European Youth Center, une iniziative clamade “The role of media on the road to social inclusion of young refugees: Hearing the Voices of Young Refugees in Europe– La funzion dai mieçs di comunicazion dilunc de strade de inclusion sociâl dai zovins rifugjâts: scoltìnlis lôr vôs” metude adun de organizazion VYRE (Voices of Young Refugees – Vôs di Zovins Rifugjâts). Pal stât talian e in rapresentance di Radio Onde Furlane al è stât clamât a Strasburc Daniel Samba, condutôr radiofonic de trasmission Il Friûl piturât di neri e atôr intal spetacul teatrâl Pieri Di Brazzaville di Paolo Patui e Gigi Dall’Aglio, in plui che di cualchi pontade dal serial televisîf Felici ma Furlans. Samba, origjinari dal Camerum, al è un zovin rifugjât che za di agns al vîf in Friûl, dulà che al à fate sô la culture e la lenghe furlane, so prin strument di integrazion e di lavôr. Daniel al à lavorât in diviersis produzions de Cooperative Informazione Friulana sei par television (tant che il program Balon salvadi su Telefriuli), sei par radio là che al à condusût une schirie di trasmissions di informazion pai citadins imigrâts in Friûl(Passepartout, Colors). Impussibilis di dismenteâ lis sôs intervistis par furlan in Friûl piturât di Neri, là che plui di une volte politics e operadôrs culturâi a àn fat fature a rispuindii par furlan, o ancje i bote e rispueste pes stradis di Udin là che ur “insegnave” ai furlans la lôr lenghe, interogantju sul significât di proverbis e detulis furlanis. A Strasburc si presente fuart di chestis esperiencis tai mieçs di comunicazion e al rapresente chel Friûl che nol à pôre di dâi vôs e microfons ai gnûfs citadins. La sô testemoneance e jentre ad in plen intes finalitâts de iniziative di Strasburc che e vûl “capî cemût che si puedin doprâ i mieçs di comunicazion par produsi cambiaments positîfs inte societât e intes vitis dai zovins rifugjâts, massime cul contribuî a combati i prejudizis”.

sabato 10 marzo 2012

VIERS LA CONFERENCE PROGRAMATICHE PAL 2013

La segretarie regjonâl Serracchiani e il coordenadôr pe conference programatiche Enzo Martines e invidin i segretaris e i diretîfs dai circui, lis assembleis, lis direzions e lis segretaris provinciâls e regjonâls a un incuintri pe presentazion dai prins documents de conference programatiche dal Pd pal 2013 elaborâts di bande dai forum e za passâts in direzion regjonâl. Apontament par sabide ai 17 di març 2012, a lis 14.30, alì dal Auditorium dal Centri Culturâl Paolino d’Aquileia in Vie Treppo 5b a Udin. Il program dai lavôrs al proviôt la introduzion di Debora Serracchiani, la esposizion di une premesse politiche ai documents di bande di Enzo Martines e un struc des propuestis afidât ai referents dai grups di lavôr: Ezio Beltrame pe sanitât, Renzo Liva pal lavôr e Giorgio Brandolin pes infrastruturis. Daspò dal dibatit, cun contribûts par cure dal Grup Regjonâl, viers lis 17.30 al sierarà la riunion il coordenadôr de segretarie nazionâl dal Partît Democratic Maurizio Migliavacca.

JACUME: RATIFICADE LA CJARTE EUROPEANE PES LENGHIS DI BANDE DAL GUVIER TALIAN

Ripuartin la notizie dal blog dal Comitât 482:
Intant de riunion dal Consei dai ministris di îr, tra la istituzion de fieste pal inovâl de "unitât de Italie", l'aument dai podês dal esecutîf e un percors facilitât pal cumierç di armis, il guvier Monti al à ratificade la Cjarte europeane pes lenghis regjonâls o minoritariis (1992). Si trate di un dai documents di fonde pal rispiet dai dirits linguistics des comunitâts minorizadis che il stât talian al veve firmât agns indaûr, ma nol veve po ratificât. Là che, la mancjance de ratifiche, e impedive di meti in vore i principis de Cjarte intal stât talian. Tant par fâ un esempli, la mancjance de ratifiche e jere stade doprade (in maniere dal dut strumentâl e cence fondis) par motivâ il fat che la RAI no meteve in vore la leç statâl 482/99 che e garantìs spazis pes lenghis minoritariis ricognossudis dentri dal servizi radiotelevisîf public. A son coventâts cetancj agns, ma cumò la ratifiche de Cjarte e je rivade: jacume! Magari cussì no, cheste biele gnove e rive distès a lassânus la bocje garbe. Cun di fat, cemût si podaraial rispietâ i principis e i contignûts de Cjarte cuant che il strument principâl par fâlu, ven a dî - daûr des stessis peraulis jessudis îr de bocje dai rapresentants dal guvier talian - la leç statâl 482/99, al è aromai cuasi cence risorsis propit par vie dai tais decidûts dal guvier Monti? Chel istès, par cjalâ chê altre muse de medaie, o podìn dî che cu la ratifiche de Cjarte o vin une arme in plui pe nestre lote e, pôc ma sigûr, no mancjarìn di doprâle.

mercoledì 7 marzo 2012

08/03/2012 - LA FUARCE DES FEMINIS

Lait a viodi lis iniziativis in Provincie di Udin sul sît dal PD provinciâl

CONVOCÂT IL COORDENAMENT PD DE BASSE PAR DISCUTI DI RIFORMIS E SANITÂT


Il coordenadôr dal Partît Democratic de Basse Fulvio Tomasin al à convocât il coordenament de Basse slargjât ai segretaris e ai circui par discuti di sanitât e in particolâr de Riforme dal Sisteme Sanitari Regjonâl. Ae riunion, che si davuelzarà joibe ai 15 di març, a lis 20.30, inte sale dal Ristorant La Filanda (Auditorium S. Marc), a parteciparan Ezio Beltrame, za Assessôr Regjonâl ae Sanitât e coordenadôr dal Forum Sanitât dal Pd e une rapresentance di rapresentants sindacâi de sanitât funzion publiche.

CUASI, CUASI O VOI A FÂMI UN ZÎR ………… A PALME

Le Associazion Culturâl Bottega Errante adun cul Servizi Bibliotecari Intercomprensoriâl e la Biblioteche di Palme us invidin vinars ai 23 di març, a lis 18.30, alì dal Salon dal Municipi di Palme ae performance di leturis, musiche e tant altri “Quasi, quasi vado a farmi un giro. Viaggiatori e viandanti sulla terra che si muove” cun Mauro Daltin, Maurizio Mattiuzza, Claudio Moretti e la ghitare e la vôs di Renzo Stefanutti. Jentrade libare.
Lei achì il program complet.

martedì 6 marzo 2012

I "ARBUI" DI MATTIUZZA DOMENIE AE LIBRARIE FELTRINELLI DI UDIN

Interessant apontament par domenie ai 11 di març, a lis 17.00, alì de Librarie Feltrinelli di Udin. Maurizio Mattiuzza al presentarà il so ultin libri di poesiis "Gli alberi di Argan" compagnât de ghitare dal cjantautôr Renzo Stefanutti e des notis critichis dal scritôr Pericle Camuffo: un viaç cuintrivint cal partìs des stradis dal Maroc par rivâ al Friûl e a lis tantis musis dal nord est talian. Un libri di comprâ e di lei, une "performance" di no pierdi!

ELEZIONS AMINISTRATIVIS 2012: AL VÔT AI 6 E 7 DI MAI

Le Regjon e à decidût lis datis pes elezions aministrativis che si davuelzaran intal 2012: si votarà ai 6 e 7 di mai. Te Basse Furlane i comuns interessâts e son Çarvignan, Pucinie e Lignan. A Pucinie lis cjartis e son inmò cuviertis invezit a Çarvignan il candidât dal centri-çampe al sarà Gianluigi Savino, e a Lignan la storiche liste civiche progressiste Comunità Lignano e à di timp decidût di poiâ il candidât des listis civichis Luca Fanotto.

FIESTE DES FEMINIS A RIVIGNAN