giovedì 25 aprile 2013

1945/2013 - ANCJEMO' RESISTENCE. BON 25 DI AVRÎL A DUCJ!

la formazion gap dai "diavoli rossi"
di gelindo citossi "romano il mancino"
in pîts, al centri, duilio fabbro "premoli" di palaçûl

giovedì 18 aprile 2013

DOMENIE E LUNIS. PAR TORNÂ A JESSI SPECIÂI. PARDABON

21-22 avrîl - pe Regjon votait DEBORA SERRACCHIANI
 
e pe Provincie di Udin ANDREA SIMONE LERUSSI
(candidât pal PD intal coleç di Rivignan Cristian SEDRAN)


martedì 16 aprile 2013

STORIIS DI RESISTENCE TE ZORNADE MONDIÂL DE TIERE

Lis manifestazions pe zornade mondiâl de tiere intai ultins agns si organizavin te Aziende Marianis-Volpares a Palaçûl. Chest an, dopo che Ersagricola, cul benstâ dai campions de ipocrisie Tondo e Violino e te complete indiference dai sorestants locâi e dal mont de politiche e a vendût (par altri cun procedure dut fûr che trasparente) il ram di aziende di Marianis rinunciant a un element strategjic pe valorizazion dal teritori e par sburtâ un gnûf model di disvilup, ancje la fieste de tiere si è trasferide in chel di Palme. Segnalin la cunvigne che si davuelzarà vinars ai 19 di avrîl: biel il titul "I zardinîrs di Diu. Storiis di Resistence al scancelâment dai lûcs". Te foto dal volantin la aziende Marianis-Volpares. Une volte bens coletîfs, cumò bens comuns e no di cuatri politics e di un consei di aministrazion. Bens di ducj, risorsis, identitât, paisaç, teritori. Cumò come dîs agns indaûr, resisti, resisti, resisti.

sabato 13 aprile 2013

RESISTENZE 2013: "CJARGNE 1944: UNE ESTÂT DI LIBERTÂT" TES SCUELIS DAL ISTITÛT COMPRENSÎF DI PALACÛL

Vuê di buinore il tierç apontament de rassegne de ANPI "Resistenze 2013" : proiezion dal film documentari "Carnia 1944: un'estate di libertà" intal Istitût Comprensîf di Palaçûl. Incuadrament storic dal prof. Flavio Fabbroni de Anpi di Udin. Un grazie di cûr ai dirigjents, ai insegnants e ai arlêfs ..... une biele esperience di ripeti in curt.
 
 

lunedì 1 aprile 2013

FIESTE DAI 3 DI AVRÎL: LA FIESTE DAL FRIÛL, LA FIESTE DI DUCJ


Tancj auguris a dutis/ducj pe Fieste dal Friûl. Us invidìn a partecipâ aes tantis iniziativis che si davuelzaràn un pôc pardut e, pe ocasion, us invidin a lei un editoriâl une vore biel di Renzo Balzan, publicât intal ultin numar di Ladins dal Friûl. Tes peraulis di Renzo o ricognossin cetantis olmis di che co volaressin fâ sù: Un Friûl diferent.
 
 
DAL TIMÂF A LA LIVENCE
3 di Avrîl: la fieste di ducj
Tal inovâl dai 736 agns di fondazion de Patrie dal Friûl 3 di Avrîl 1077 - 3 di Avrîl 2013, za fa 936 agns e nasseve la Patrie dal Friûl. Vadì che “La Fieste dai 3 di Avrîl” al è un fat storic, par vie che l’acjadiment che al è ae sô fonde e je une realtât dal secul XI, cun conseguencis duradis centenârs di agns, che a àn mantignût la lôr vitalitât fint ai nestris dîs. La celebrazion di cheste dade si è trasformade intune cerimonie uficiâl, ae cuâl a partecipin diviersis istituzions, dai Comuns aes trê Provinciis furlanis di Pordenon, Gurize e Udin, une des cuâl e ricuarde il 3 diAvrîl ancje tal propi Statût.
Dut câs cheste fieste no je mai stade uficializade, tal sens che no esistin leçs che a proclamin une “Fieste Nazionâl dal Friûl”. Pensade, inventade e volude di chel predi “rivoluzionari” che al è stât Pre Checo Placerean tal 1977, planc planc e sta invezit cuistant i contignûts di une fieste de int, con moments culturâi e di rievocazion storiche, se no fintremai di fieste popolâr, cence che par altri l’intîr popul furlan indi vegni coinvolt (de Cjargne a Puart, di Pordenon a Gurize, di Udin a Sapade/Plodn). Dispès in cheste ocasion, come in altris darest, al semee che il 3 di Avrîl e sedi une cjosse presint dome tal Friûl centrâl e in Cjargne, o sei dome in chei teritoris dulà che la fevelade furlane e je inmò presint. In ogni câs, no si po dineâ che a diviers livei si vebi almancul une cualchi cussience di ce che al è il 3 di Avrîl. Cuant che Pre Checo, e il grop dai predis di Glesie Furlane che a jerin cun lui, indi àn fevelât pe prime volte, tal 1977, vâl a dî juste a 900 agns dal diplome imperiâl di Indrì IV che al concedeve il Ducât dal Friûl al Patriarcje Sigjeart, si è doprade la espression “fieste”, volint intindi l’inovâl di une memorie di gjonde, di sperance, di spirt di identitât, di voie di rinassince intun avignî in miôr. O jerin, in fats, intai moments intrigôs dal daspò taramot e dai ferments plui vivarôs pe autonomie, la lenghe, il svilup economic e sociâl, la brame di une universitât autonome e dut chest al vignive vivût come une smire insiemit culturâl e politiche par une Friûl aromai madressût, cussient, libar di cjapâ lis decisions plui adatis ae propie indole e vocazion, ben inlidrisât inte sô storie e daviert aes sfidis dal presint.
Dal 1977 a vuê di agns a ’nd è passâts, Pre Checo Placerean, Pre Antoni Beline, Pre Pieri Londar e altris furlaniscj storics no son plui cun nô, magari cussì no, e la lôr mancjance si la sint cetant. Si sint che e mancje la grinte e l’entusiasim di chescj personaçs. Si rindisi cont che la “Cuestion Furlane” e je lade a finîle intune sorte di sgjarpie di dulà che e stente a diliberâsi. Par esempli al è dificil, vuê, distacâ la cuestion de autonomie e de tutele linguistiche dal rest dai problemis che si stan proponint: problemis di ocupazion, soredut di ocupazion dai zovins e des feminis, di imigrazion, di integrazion, di ambient e di paisaç, di viabilitât, di sparagn e di aument dai presits, di scuele, di spazis par fâ culture, di pluralitât e diplurilinguisim.
Ma, soredut, cuale imagjin di popul furlan vino nô vuê e dino a no stes, a cui che al ven a vivi chenti, a cui che nus vualme di fûr regjon? Cui sono dabon i Furlans vuê? Resonant di 3 di Avrîl, al è just che si feveli di lenghe, di culture, di autonomie, ma ancje di societât e di ambient dulà che la lenghe ladine dal Friûl si fevele,dulà che si vîf, dulà che si progjete o ben si paidìs ilfutûr. L’om furlan, la femine furlane, il frut furlan, l’anzian furlan: cemût vivino, cemût pensino, cemût si metino in rapuart cun chei altris? E par chei altris no vin di intindi chei che a loghin al di là des monts, o dal Timau e de Livence, ma chei altris che a stan rivant chenti, chei altris che a son bielzà rivâts chenti di agns in ca. Cetancj di chescj si sintino integrâts e ben acolzûts. Se a son nassûts achì, si sintin fintremai Furlans a ducj i efiets, ancje par vie che a fevelin pulît la nestre lenghe, dispès miôr di tancj dai nestris. Ma scoltant lis esperiencis di feminis e di oms, zirant pai nestris paîs, leint i gjornâi, o sintin inmò storiis di separazion e di esclusion, pal colôr de piel, pe diviersitât de divignince, pe diviersitât di religjon e di lenghe. Chest dal sigûr no nus fâs gran onôr.
In chescj moments cussì dificii, massime par chel che al rivuarde i puescj di lavôr, a son cuestions reâls, che dal sigûr a saran ogjet di dibatit e di discussion, ma che dut câs no puedin jessi assents intune vision globâl e complete dal nestri jessi Furlans vuê. Se fieste e à di jessi, il 3 di Avrîl al à di vierzi lis sôs puartis a dutis lis problematichis esistints, in maniere che lis justis aspirazions ae autonomie, al autoguvier, ae autodeterminazion, ae tutele e ae incressite de nestre lenghe mari, al svilup sostignibil, a cjatin il teren plui adat par cressi e par sperâ che si puedin tradusi in realtât. Une realtât, finalmentri, il plui pussibil condividude, di chei che a fevelin par furlan e par sloven, par todesc e par talian, di cui che al è rivât achì di nô di pôcs o di tancj agns. Il Friûl al è stât di simpri une beorcje di lenghis e di culturis, e dal sigûr lu jere ancje tal 1077 cuant che al è deventât un Stât indipendent che al è durât fint al 1420. Par chest o vin di fâ in mût che la “Fieste dai 3 di Avrîl” e deventi la fieste di ducj. (renzo balzan)