LA VÔS DAL FRIÛL A STRASBURC

La funzion dai mieçs di comunicazion dilunc de strade de inclusion sociâl dai zovins rifugjâts: scoltìn lis lôr vôs. La vôs dal Friûl a Strasburc e sarà chê di Daniel Samba.

Dai 4 ai 10 di Març si davuelç a Strasburc, alì dal European Youth Center, une iniziative clamade “The role of media on the road to social inclusion of young refugees: Hearing the Voices of Young Refugees in Europe– La funzion dai mieçs di comunicazion dilunc de strade de inclusion sociâl dai zovins rifugjâts: scoltìnlis lôr vôs” metude adun de organizazion VYRE (Voices of Young Refugees – Vôs di Zovins Rifugjâts). Pal stât talian e in rapresentance di Radio Onde Furlane al è stât clamât a Strasburc Daniel Samba, condutôr radiofonic de trasmission Il Friûl piturât di neri e atôr intal spetacul teatrâl Pieri Di Brazzaville di Paolo Patui e Gigi Dall’Aglio, in plui che di cualchi pontade dal serial televisîf Felici ma Furlans. Samba, origjinari dal Camerum, al è un zovin rifugjât che za di agns al vîf in Friûl, dulà che al à fate sô la culture e la lenghe furlane, so prin strument di integrazion e di lavôr. Daniel al à lavorât in diviersis produzions de Cooperative Informazione Friulana sei par television (tant che il program Balon salvadi su Telefriuli), sei par radio là che al à condusût une schirie di trasmissions di informazion pai citadins imigrâts in Friûl(Passepartout, Colors). Impussibilis di dismenteâ lis sôs intervistis par furlan in Friûl piturât di Neri, là che plui di une volte politics e operadôrs culturâi a àn fat fature a rispuindii par furlan, o ancje i bote e rispueste pes stradis di Udin là che ur “insegnave” ai furlans la lôr lenghe, interogantju sul significât di proverbis e detulis furlanis. A Strasburc si presente fuart di chestis esperiencis tai mieçs di comunicazion e al rapresente chel Friûl che nol à pôre di dâi vôs e microfons ai gnûfs citadins. La sô testemoneance e jentre ad in plen intes finalitâts de iniziative di Strasburc che e vûl “capî cemût che si puedin doprâ i mieçs di comunicazion par produsi cambiaments positîfs inte societât e intes vitis dai zovins rifugjâts, massime cul contribuî a combati i prejudizis”.