20 JUGN 2012 ZORNADE MONDIÂL DAL RIFUGJÂT: INIZIATIVIS IN FRIÛL

Chi è il rifugiato?

Il rifugiato è una persona che, “per fondato timore di persecuzione per motivi di razza, religione, nazionalità, appartenenza ad un determinato gruppo sociale od opinione politica, si trova fuori del Paese di cui ha la cittadinanza e non può a causa di tale timore, avvalersi della protezione di tale Paese”.

(Convenzione di Ginevra del 1951 sullo status dei rifugiati, art.1)

Il 20 di Jugn ch’al ven si celebre la Zornade Mondiâl dal Rifugjât, apontament anuâl volût da l’Asemblee Gjenerâl da lis Nazions Unidis, che di plui di dîs agns e à tant che obietîf la sensibilizazion da la opinion publiche su la condizion, dispès no cognossude da la plui part, di cheste categorie particolâr di migrants. L’Associazion Nuovi Cittadini ONLUS, ent di tutele e gjestôr, in provincie di Udin, di progjets teritoriâi che a fasin part dal “Sisteme di protezion par chei ch’a domandin asîl e rifugjâts – SPRAR dal Ministeri dal Interni, e promôf ancje chest an iniziativis di informazion sul teme da la protezion internazionâl. La Zornade Mondiâl dal Rifugjât 2012 si propon di rifleti su lis sieltis dificilis che un rifugjât al è spes costret a fâ ta la sô vite par cirî protezion: “Restâ blocâts intune realtât fate di gueris e di muart?” Opûr “Meti la propie vite ta lis mans di traficants e frontâ il mâr? “Scjampâ e lassâ la sô famee?” o ancjemò “Restâ e scombati cuintri da la sô int?”  Tu, ce varessistu fat?

Miercus, ai 20 di Jugn, oris 18.

Udin, Vie Sabbadini, 52

Us conti la mê citât……

Mediant musichis, mangjative, zûcs e lis storiis da lis nazions di divignince, i rifugjâts a incuintrin la citât e a contin di lôr. Se al plûf, l’iniziative no si le fasarà.

Vinars, ai 22 di Jugn 2012, oris 20.45

Vilecjasse di Lestize (UD), Agriturisim ai Colonos

I rifugjâts ch’a si ur à dât bon acet in Friûl a contin di lôr e nus domandin: Tu ce varessistu fat? Proiezion dal documentari “Mare chiuso” di Stefano Liberti e Andrea Segre, po dopo o fasarìn un ghiringhel cun plats tipics dai paîs di divignince dai rifugjâts

Lunis, ai 25 di Jugn, oris 20.30

Vile Santine (UD), Centri Sociâl (sore dal Ufici Postâl)

I rifugjâts ch’a si ur à dât bon acet in Friûl a contin di lôr e nus domandin? Tu ce varessistu fat? Proiezion dal documentari “Mare chiuso” di Stefano Liberti e Andrea Segre

CUNVIGNE AL CENTRI BALDUCCI: IL DIRIT AE PROTEZION. CUÂL FUTÛR PAL DIRIT DI ASÎL IN ITALIE?

Il Centri Ernesto Balducci e la Rêt pai Dirits di Citadinance dal Friûl – Vignesie Julie e invidin a partecipâ al incuintri public "IL DIRIT AE PROTEZION. Cuâl futûr pal dirit di asîl in Italie?" che si davuelzarà lunis ai 19 di març 2011, a lis 20.30, alì dal

Auditorium dal Centri Balducci a Çuian.

Chel di asîl al è un dirit fondamentâl de persone, stabilît di bande dal articul 10 de Costituzion. Furnî, protezion a cui che al scjampe di persecuzions, conflits e violencis coletivis al è un oblic juridic e etic de Republiche. Cun dut che la Italie di cualchi an a cheste bande e sedi deventade un paîs di destinazion dai rifugjâts e no plui dome un paîs di transit, lis politichis publichis no son sigurementri adeguadis ae situazion.

Il stes dirit di asîl al reste un teme pôc cognossût di gran part de opinion publiche ma ancje dal mont de culture e di chel de politiche. Daspò de sentence de Cort europeane pai dirits dal om che e condane cun durece l’Italie par vê parât indûr i sfolâts che e rivavin de Libie e dopo la fin de cussì clamade “emergjence Nord-Afriche” al è necessari vierzi une gnove pagjine dal dirit di asîl in Italie. In ocasion de presentazion de ricercje “Il dirit ae protezion” un dai prins studis che al cjape in esam il stât dal sisteme asîl in Italie intai ultins agns, discutin des prospetivis dal dirit di asîl intal nestri Paîs cun:

Furio Honsell - Sindic di Udin

Guglielmo Pitzalis -  Miedi, referent dal GrIS Fvg de S.I.M.M. (Societât Taliane di Medisine des Migrazions)

Silvia De Lotto - Associazion Nuovi Cittadini Onlus, ent gjestôr SPRAR di Udin e coordenadore de rêt regjonâl “Crocicchio-Voikrucigo”

Pietro Paviotti - Sindic di Çarvignan e referent ANCI regjonâl dal Friûl Vignesie Julie

Tamara Amadio - Avocat, CIR (Consei Talian pai rifugjâts)

Gianfranco Schiavone - Component dal diretîf nazionâl A.S.G.I. (Associazion Studis Juridics su la Imigrazion) e coordenadôr sientific de ricercje “Il dirit ae protezion”

Introduzion e coordenament par cure di Pierlugi Di Piazza, Centri Balducci

LA VÔS DAL FRIÛL A STRASBURC

La funzion dai mieçs di comunicazion dilunc de strade de inclusion sociâl dai zovins rifugjâts: scoltìn lis lôr vôs. La vôs dal Friûl a Strasburc e sarà chê di Daniel Samba.

Dai 4 ai 10 di Març si davuelç a Strasburc, alì dal European Youth Center, une iniziative clamade “The role of media on the road to social inclusion of young refugees: Hearing the Voices of Young Refugees in Europe– La funzion dai mieçs di comunicazion dilunc de strade de inclusion sociâl dai zovins rifugjâts: scoltìnlis lôr vôs” metude adun de organizazion VYRE (Voices of Young Refugees – Vôs di Zovins Rifugjâts). Pal stât talian e in rapresentance di Radio Onde Furlane al è stât clamât a Strasburc Daniel Samba, condutôr radiofonic de trasmission Il Friûl piturât di neri e atôr intal spetacul teatrâl Pieri Di Brazzaville di Paolo Patui e Gigi Dall’Aglio, in plui che di cualchi pontade dal serial televisîf Felici ma Furlans. Samba, origjinari dal Camerum, al è un zovin rifugjât che za di agns al vîf in Friûl, dulà che al à fate sô la culture e la lenghe furlane, so prin strument di integrazion e di lavôr. Daniel al à lavorât in diviersis produzions de Cooperative Informazione Friulana sei par television (tant che il program Balon salvadi su Telefriuli), sei par radio là che al à condusût une schirie di trasmissions di informazion pai citadins imigrâts in Friûl(Passepartout, Colors). Impussibilis di dismenteâ lis sôs intervistis par furlan in Friûl piturât di Neri, là che plui di une volte politics e operadôrs culturâi a àn fat fature a rispuindii par furlan, o ancje i bote e rispueste pes stradis di Udin là che ur “insegnave” ai furlans la lôr lenghe, interogantju sul significât di proverbis e detulis furlanis. A Strasburc si presente fuart di chestis esperiencis tai mieçs di comunicazion e al rapresente chel Friûl che nol à pôre di dâi vôs e microfons ai gnûfs citadins. La sô testemoneance e jentre ad in plen intes finalitâts de iniziative di Strasburc che e vûl “capî cemût che si puedin doprâ i mieçs di comunicazion par produsi cambiaments positîfs inte societât e intes vitis dai zovins rifugjâts, massime cul contribuî a combati i prejudizis”.