RELAUNCHING EUROPE: LA NESTRE VISION ALTERNATIVE PAL FUTÛR

Relaunching Europe: la nestre vision alternative pal futûr

Workshop inmaneât dal Grup S&D (Socialiscj e Democratics) intal Parlament European 30 di zenâr 2013 -  19.30 - Palaç dai Congrès de Stazion Maritime, Triest.
Cun Debora Serracchiani, il grup S&D, i retôrs des Universitâts di Udin e Triest, e Boris Pahor par un confront sui valôrs europeans, la culture e la politiche.
Program:
Intervent di salût di bande di Debora Serracchiani, eurodeputade, grup S&D
Introduzion di bande di Hannes Swoboda, president dal grup S&D
Workshop I – 19.30/20.30
Valôrs europeans: il pont di viste de culture
Giorgio Pressburger, scritôr e regjist di cine e teatri
Relatôrs: Boris Pahor, scritôr – Cristiana Compagno, retore de Universitât di Udin – Francesco Peroni, retôr de Universitât di Triest
Dibatit cul public
Workshop II– 20.30/21.30
Valôrs europeans: il pont di viste de politiche
Igor Lukšić, president dal partît socialdemocratic sloven
Relatôrs: Hannes Swoboda, president dal grup S&D – Eliza Politi, (tbc) componente dal Bureau ECOSY – Hadleigh Roberts, zovins laburiscj, UK
Dibatit cul public
Conclusions, buffet e musiche dal vîf

 

LA VÔS DAL FRIÛL A STRASBURC

La funzion dai mieçs di comunicazion dilunc de strade de inclusion sociâl dai zovins rifugjâts: scoltìn lis lôr vôs. La vôs dal Friûl a Strasburc e sarà chê di Daniel Samba.

Dai 4 ai 10 di Març si davuelç a Strasburc, alì dal European Youth Center, une iniziative clamade “The role of media on the road to social inclusion of young refugees: Hearing the Voices of Young Refugees in Europe– La funzion dai mieçs di comunicazion dilunc de strade de inclusion sociâl dai zovins rifugjâts: scoltìnlis lôr vôs” metude adun de organizazion VYRE (Voices of Young Refugees – Vôs di Zovins Rifugjâts). Pal stât talian e in rapresentance di Radio Onde Furlane al è stât clamât a Strasburc Daniel Samba, condutôr radiofonic de trasmission Il Friûl piturât di neri e atôr intal spetacul teatrâl Pieri Di Brazzaville di Paolo Patui e Gigi Dall’Aglio, in plui che di cualchi pontade dal serial televisîf Felici ma Furlans. Samba, origjinari dal Camerum, al è un zovin rifugjât che za di agns al vîf in Friûl, dulà che al à fate sô la culture e la lenghe furlane, so prin strument di integrazion e di lavôr. Daniel al à lavorât in diviersis produzions de Cooperative Informazione Friulana sei par television (tant che il program Balon salvadi su Telefriuli), sei par radio là che al à condusût une schirie di trasmissions di informazion pai citadins imigrâts in Friûl(Passepartout, Colors). Impussibilis di dismenteâ lis sôs intervistis par furlan in Friûl piturât di Neri, là che plui di une volte politics e operadôrs culturâi a àn fat fature a rispuindii par furlan, o ancje i bote e rispueste pes stradis di Udin là che ur “insegnave” ai furlans la lôr lenghe, interogantju sul significât di proverbis e detulis furlanis. A Strasburc si presente fuart di chestis esperiencis tai mieçs di comunicazion e al rapresente chel Friûl che nol à pôre di dâi vôs e microfons ai gnûfs citadins. La sô testemoneance e jentre ad in plen intes finalitâts de iniziative di Strasburc che e vûl “capî cemût che si puedin doprâ i mieçs di comunicazion par produsi cambiaments positîfs inte societât e intes vitis dai zovins rifugjâts, massime cul contribuî a combati i prejudizis”.