Joibe 9 Dicembar 2010
Teatri Palamostre - Plaçâl Paolo Diacono - UDIN a lis 20,00
Al torne a sunâ IL CANZONÎR DI DAEL intun gnûf concert "Di nuovo come un tempo..."
Daspò di un grum di agns, e torne a sunâ un grup storic dal panorame musicâl furlan, che intai agns '70 e '80 al à congnossût une stagjon di grande partecipazion e impegn intal mont culturâl furlan dal post taramot, rapresentant une avanguardie inte ricercje musicâl e inte proposizion di une gnove musiche furlane cui tescj di cualchidun dai plui significatîfs poets furlans, di Leonardo Zanier a Galliano Zof, di Pier Paolo Pasolini a Gianni Gregoricchio.
La valorizazion de lenghe furlane, tant che imprest di libertât e dirit di popul par fâ cuintri ae globalizazion des culturis, si compagne di simpri intal lavôr dal Canzonîr cun contignûts sociâi indreçâts ai “senzastoria”, aes classis sociâls che di sempri a subissin injustiziis e prepotencis.
La scjalute dal concert e previôt cjançons furlanis vecjis e gnovis (tra chestis "Canson dismitude", une poesie di Elio Bartolini musicade di Giancarlo Velliscig) e une schirie di gnovis baladis par talian su lis tematichis de cuotidianitât furlane e planetarie.
Dal pont di viste musicâl il grup, insiorât de partecipazion di zovins musiciscj furlans di talent e dai arangjaments di Alessio Velliscig, al mostre un stîl tipic de cjançon di autôr moderne, in ambientazion acustiche cjade, mantignint la sô vocalitât che e alterne moments solistics e moments di coralitât, intal spirt dal Canzonîr di Dael.
La formazion dal grup e jé:
Alessandra Kersevan, vôs
Viviana Gallet, vôs
Giancarlo Velliscig, vôs e chitare
Paolo Del Ponte, vôs e bas el.
Alessio Velliscig, vôs e chitaris
Antonio Merici, violoncel
Alberto Pezzetta, tastieris
Alessio Benedetti, baterie e percussions
Jentrade a ufiarte libare.
