La fondazion Valmi Puntin, lis
sezions ANPI di Aquilee e de Basse
Furlane, la Leghe SPI CGIL di Aquilee e la AUSER Basse Furlane, in colaborazion
cul Centri di documentazion e ricercje “L. Gasparini” us invidin a partecipâ ae
presentazion dal libri di Federico Snaidero
“Giovanni Minut. Terra e libertà: storia di un rivoluzionario friulano”
che si davuelzarà vinars ai 16 di novembar, a lis 20.30, alì dal Municipi di
Aquilee.
Te opare Snaidero al
delineie il profîl biografic di une
personalitât jenfri lis plui impuartantis e rapresentativis de storie furlane
dal secul passât, la ricostruzion di une vicende personâl e politiche che e a
traviarsât il ‘900, de Grande Vuere ae stagjon des lotis contadinis te Basse,
dal avent dal fassisim ae emigrazion in Americhe Latine.
E parteciparan Federico
Snaidero, autôr de publicazion, Giancarlo Bertuzzi, President dal Istitût
Regjonâl pe Storie dal Moviment di Liberazion di Triest e Dario Mattiussi,
President al Centri di documentazion e ricercje “Leopoldo Gasparini di Gardiscje.
Vie pe serade e sarà
ricuardade ancje la figure di Renato Jacumin che intal 1974 al publicà un dai
prins saçs dedicâts a lis lotis agrariis intal Friûl orientâl.
Gjavât fûr di Pup, Carli
2006: Memoriis platadis. Olmis di storie te narative popolâr furlane.Feagne:
Edizions Associazion Culturâl “El Tomât”
Zuan Minut (1895 – 1967)
Giovanni Minut (dispès clamât Zovanin o, a pont,
Zuan) al jere nassût a Visc ai 26 di Dicembar dal 1895 di une famee contadine.
Di zovin al frecuente la scuele serâl agrarie di Gurize e cuant che e sclope la
prime vuere mondiâl si ricjate cu la divise austriache, prime tes retroviis dal
Friûl orientâl e po sui confins a soreli jevât dal Imperi. “Arlêf ” di une
figure interessante di socialist e artist come Rodolfo Del Mestri [1], finide
la vuere, si bute ad in plen inte militance politiche, ma soredut sindacâl
prime cul partît socialist e po, cu la crevadure dal ’21, cui comuniscj. La sô
passion, la sô preparazion e la sô capacitât oratorie lu puartin in curt a
deventâ segretari de Federazion Provinciâl dai Lavoradôrs de Tiere, la leghe
rosse dai contadins ative intal ex Friûl imperiâl [2]. Lu cjatìn protagonist intes lotis dai contadins e
dai sotans dal Friûl orientâl che si cjatin a fâ i conts cuntune azion simpri
plui agressive dai latifondiscj e dai proprietaris locâi e cuntun cambiament
politic e aministratîf traumatic (cheste zone dal Friûl e jere stade, di fat,
sot dal Imperi austriac par almancul cinc secui). Il partît popolâr che,
fintremai la vilie de vuere, al jere stât il pont di riferiment de grande part
de popolazion, acusât di jessi austriacant al ven perseguitât cun fuarce e i
siei dirigjents principâi, tant che Faidutti e Bugatto, a son obleâts al esili.
Ancje lis concuistis sindacâls e sociâls otignudis prin de vuere a vegnin
metudis in discussion dal gnûf ordin politic che tai prins agns, intes gnovis
provinciis, si poie, di fat, su comissaris nomenâts inaltrò e su la
aministrazion militâr [3]. In curt al devente un dai personaçs plui
cognossûts dal Friûl orientâl e un dai plui amâts de int. La sô figure e cjate
un rivoc grues ancje su “Il Lavoratore della Sera”, cuotidian dai
socialiscj stampât a Triest, là che al ven sorenomenât “il pridicjadôr socialist”
e presentât come “il giovane compagno Minut che nelle riunioni fevele simpri
furlan”. Minut, di fat, al fevele simpri par furlan ancje tai siei
comizis e, ancje par chest, si cjate a ce fâ dispès cui carabinîrs che i
proibissin di fevelâ te sô lenghe, come che i capite tal Març dal 1920 a
Lonzan. Cuant che po, tal Mai di chel stes an, al ven arestât a Tierç tant che
al cîr di fermâ i carabinîrs che a vuelin secuestrâi il fen a di un contadin,
si discjadene il montafin. No coventin il stât di emergjence proclamât des
autoritâts e nancje i reparts di ardîts mandâts a ocupâ i ponts strategjics,
parcè che i lavoradôrs de tiere, ma ancje i operaris di Monfalcon si movin par
liberâ il lôr “eroi”. Minut al pant un amôr totâl pe sô lenghe, pe sô
tiere e pe sô int, che si pues viodi ancje tun librut di poesiis publicât tal
1921, [4] là che al jes dai schemis de poesie furlane in vore ta chei agns, sei
dal pont di viste stilistic, sei di chel dai contignûts (cun tescj di denuncie
sociâl e antimilitariscj). La jessude di cheste publicazion i discjadenarà
cuintri dute la asse di une cierte part dal mont culturâl furlan che al
judicave scandalôs sei il so stîl di roture, sei i siei argoments. Tal 1923 al emigre in Sud Americhe, prime in
Argjentine e po in Uruguay, là che si fasarà un non te industrie dal lat. A
obleâlu a cheste sielte e je la campagne
difamadorieinviade
cuintri di lui, no dome dai siei aversaris politics, ma ancje, e in maniere
fintremai plui feroce, dai siei ex compagns socialiscj daspò de decision di
passâ cui comuniscj. A cheste situazion si zontin lis violencis simpri plui
pesantis cuintri di lui e de sô famee de bande dai fassiscj. Ancje Minut,
duncje, come tancj altris militants antifassiscj al scugne cjapâ la strade
amare dal esili.
[1] Par savê alc di
plui su Del Mestri e sui siei rapuarts cun Minut si rimande al libri di: TASSIN,
FERRUCCIO: Artist. Gorizia: Comune di Visco.
[2] Su la ativitât di Minut inte suaze
politiche e sindacâl di chei agns intal Friûl orientâl al reste fondamentâl il
libri di: JACUMIN, RENATO 1974: Le lotte contadine nel Friuli orientale
1891/1923. Udine: Doretti Editore.
[3] In mert si pues viodi: PUP, CARLI
1998: La seconde Irlande. Il Friûl orientâl tra il 1915 e il 1922. – in “La
Comugne”, n.2. Udin: Edizions Kappa Vu.
[4] MINUT, GIOVANIN 1921: Rimis furlanis –
Gurize: Tipografie Social. La publicazion e je stade riscuvierte al
professôr Zorç Faggin che le à fate ristampâ intal 1977.
"Us saludi, o flamis di fûc, / e us invidi a disfâ tun moment / il
sisteme dal siôr e dal pu[a]r / e po il mont sarà calm e content". (Zuan Minut - A lis bandieris, 1919)
Ve ca parsore il program des celebrazions pe fieste dai 25 di avrîl che si davuelzaran a Udin lunis che al ven. Par chei de Basse o ricuardìn che e je programade une cerimonie aes 9.00 di matine, in place a Palme e dopo .... ducj a Udin. A partî des 13.00, alì dal Parc dal ex-ospedâl psichiatric a S. Osvalt fieste partigjane organizade dai zovins de Anpi cun musiche e mangjâ par ducj. Cumò e simpri Resistence!
Le Associazion "Per Eluana" e invide a partecipâ ae cunvigne sul Testament Biologjic LIBARS DI SIELZI che si davuelzarà al Teatri Palamostre di Udin, lunis ai 7 di fevrâr 2011 (20.00-23.00)
Cjâr segretari, mi clami Mirela Xhaferraj, o soi citadine taliane ma di divignince e nazionalitât albanese e o fâs part de direzion provinciâl dal Partît Democratic di Udin.
Domenie ai 28 di novembar intal auditorium Zanon di Udin a si è davuelt il Congrès Provinciâl de Associazion Nazionâl Partigjans (ANPI). Un congrès une vore biel che si è strent ator des "colonis" (in particolâr il President Federico Vincenti e il segretari Luciano Rapotez) ma che al à viodût la definitive vierzidure ai zovins ancje intai organisims dirigjents de associazion. Il congrès al à elet il gnûf comitât provinciâl (Lorenzo Fabbro di Palaçûl al è stât riconfermât) e i delegâts al congrès nazionâl. Pe nestre sezion (Palaçûl,Muçane,Pucinie e Prissinins) e an partecipât tant che delegâts Mario Venturini, Cristian Sedran, Denis Nardon, Renato Zuliani e Lorenzo Fabbro (che al à fat un intervent tocjant doi cantins: lis minorancis linguistichis e il teme de memorie e dal lavôr, ricuardânt in particolâr la ricorence, che e cole chest an, dai sessante agns des Lotis dal Cormôr). 
La libertât e je partecipazion informade.
