ZUAN MINUT. TIERE E LIBERTÂT: STORIE DI UN RIVOLUZIONARI FURLAN

 

La fondazion Valmi Puntin, lis sezions ANPI di Aquilee e de  Basse Furlane, la Leghe SPI CGIL di Aquilee e la AUSER Basse Furlane, in colaborazion cul Centri di documentazion e ricercje “L. Gasparini” us invidin a partecipâ ae presentazion dal libri di Federico Snaidero  “Giovanni Minut. Terra e libertà: storia di un rivoluzionario friulano” che si davuelzarà vinars ai 16 di novembar, a lis 20.30, alì dal Municipi di Aquilee.

Te opare Snaidero al delineie  il profîl biografic di une personalitât jenfri lis plui impuartantis e rapresentativis de storie furlane dal secul passât, la ricostruzion di une vicende personâl e politiche che e a traviarsât il ‘900, de Grande Vuere ae stagjon des lotis contadinis te Basse, dal avent dal fassisim ae emigrazion in Americhe Latine.

E parteciparan Federico Snaidero, autôr de publicazion, Giancarlo Bertuzzi, President dal Istitût Regjonâl pe Storie dal Moviment di Liberazion di Triest e Dario Mattiussi, President al Centri di documentazion e ricercje “Leopoldo Gasparini di Gardiscje.

Vie pe serade e sarà ricuardade ancje la figure di Renato Jacumin che intal 1974 al publicà un dai prins saçs dedicâts a lis lotis agrariis intal Friûl orientâl.

Gjavât fûr di Pup, Carli 2006: Memoriis platadis. Olmis di storie te narative popolâr furlane.Feagne: Edizions Associazion Culturâl “El Tomât”

Zuan Minut (1895 – 1967)

Giovanni Minut (dispès clamât Zovanin o, a pont, Zuan) al jere nassût a Visc ai 26 di Dicembar dal 1895 di une famee contadine. Di zovin al frecuente la scuele serâl agrarie di Gurize e cuant che e sclope la prime vuere mondiâl si ricjate cu la divise austriache, prime tes retroviis dal Friûl orientâl e po sui confins a soreli jevât dal Imperi. “Arlêf ” di une figure interessante di socialist e artist come Rodolfo Del Mestri [1], finide la vuere, si bute ad in plen inte militance politiche, ma soredut sindacâl prime cul partît socialist e po, cu la crevadure dal ’21, cui comuniscj. La sô passion, la sô preparazion e la sô capacitât oratorie lu puartin in curt a deventâ segretari de Federazion Provinciâl dai Lavoradôrs de Tiere, la leghe rosse dai contadins ative intal ex Friûl imperiâl [2]. Lu cjatìn protagonist intes lotis dai contadins e dai sotans dal Friûl orientâl che si cjatin a fâ i conts cuntune azion simpri plui agressive dai latifondiscj e dai proprietaris locâi e cuntun cambiament politic e aministratîf traumatic (cheste zone dal Friûl e jere stade, di fat, sot dal Imperi austriac par almancul cinc secui). Il partît popolâr che, fintremai la vilie de vuere, al jere stât il pont di riferiment de grande part de popolazion, acusât di jessi austriacant al ven perseguitât cun fuarce e i siei dirigjents principâi, tant che Faidutti e Bugatto, a son obleâts al esili. Ancje lis concuistis sindacâls e sociâls otignudis prin de vuere a vegnin metudis in discussion dal gnûf ordin politic che tai prins agns, intes gnovis provinciis, si poie, di fat, su comissaris nomenâts inaltrò e su la aministrazion militâr [3]. In curt al devente un dai personaçs plui cognossûts dal Friûl orientâl e un dai plui amâts de int. La sô figure e cjate un rivoc grues ancje su “Il Lavoratore della Sera”, cuotidian dai socialiscj stampât a Triest, là che al ven sorenomenât “il pridicjadôr socialist” e presentât come “il giovane compagno Minut che nelle riunioni fevele simpri furlan”. Minut, di fat, al fevele simpri par furlan ancje tai siei comizis e, ancje par chest, si cjate a ce fâ dispès cui carabinîrs che i proibissin di fevelâ te sô lenghe, come che i capite tal Març dal 1920 a Lonzan. Cuant che po, tal Mai di chel stes an, al ven arestât a Tierç tant che al cîr di fermâ i carabinîrs che a vuelin secuestrâi il fen a di un contadin, si discjadene il montafin. No coventin il stât di emergjence proclamât des autoritâts e nancje i reparts di ardîts mandâts a ocupâ i ponts strategjics, parcè che i lavoradôrs de tiere, ma ancje i operaris di Monfalcon si movin par liberâ il lôr “eroi”. Minut al pant un amôr totâl pe sô lenghe, pe sô tiere e pe sô int, che si pues viodi ancje tun librut di poesiis publicât tal 1921, [4] là che al jes dai schemis de poesie furlane in vore ta chei agns, sei dal pont di viste stilistic, sei di chel dai contignûts (cun tescj di denuncie sociâl e antimilitariscj). La jessude di cheste publicazion i discjadenarà cuintri dute la asse di une cierte part dal mont culturâl furlan che al judicave scandalôs sei il so stîl di roture, sei i siei argoments. Tal 1923 al emigre in Sud Americhe, prime in Argjentine e po in Uruguay, là che si fasarà un non te industrie dal lat. A obleâlu a cheste sielte e je la campagne difamadorieinviade cuintri di lui, no dome dai siei aversaris politics, ma ancje, e in maniere fintremai plui feroce, dai siei ex compagns socialiscj daspò de decision di passâ cui comuniscj. A cheste situazion si zontin lis violencis simpri plui pesantis cuintri di lui e de sô famee de bande dai fassiscj. Ancje Minut, duncje, come tancj altris militants antifassiscj al scugne cjapâ la strade amare dal esili.

[1] Par savê alc di plui su Del Mestri e sui siei rapuarts cun Minut si rimande al libri di: TASSIN, FERRUCCIO: Artist. Gorizia: Comune di Visco.

[2] Su la ativitât di Minut inte suaze politiche e sindacâl di chei agns intal Friûl orientâl al reste fondamentâl il libri di: JACUMIN, RENATO 1974: Le lotte contadine nel Friuli orientale 1891/1923. Udine: Doretti Editore.

[3] In mert si pues viodi: PUP, CARLI 1998: La seconde Irlande. Il Friûl orientâl tra il 1915 e il 1922. – in “La Comugne”, n.2. Udin: Edizions Kappa Vu.

[4] MINUT, GIOVANIN 1921: Rimis furlanis – Gurize: Tipografie Social. La publicazion e je stade riscuvierte al professôr Zorç Faggin che le à fate ristampâ intal 1977.

"Us saludi, o flamis di fûc, / e us invidi a disfâ tun moment / il sisteme dal siôr e dal pu[a]r / e po il mont sarà calm e content". (Zuan Minut - A lis bandieris, 1919)