SUNS 2012: SABIDE AI 2 DI NOVEMBAR A UDIN

Vinars ai 2 di Novembar, a tacâ di 9 di sere, alì dal teatri Palamostre di Udin si tignarà la edizion 2012 di SUNS, il festival european de cjançon in lenghe minoritarie. Dilunc vie de serade a sunaran grups e cjantautôrs che a rivin de Sardegne (Randagiu Sardu cun Quilo), de citât sarde catalane dal Alguer (Claudia Crabuzza e Claudio Gabriel Sanna), dal Cjanton dai Grisons (Casper Nicca), de Ladinie dolomitane (Jean Ruaz), de comunitât cravuate dal Burgenland (Ruben Dimitri), de Arpitanie (Billy Fumey), de Ocitanie (Somi de granadas) e, clâr, ancje dal Friûl (Jonokognòs e Mig 29 Over Disneyland). Ospit speciâl di SUNS 2012 il progjet musicâl Orka che al rive jù dret des isulis Føroyar.

La jentrade e je libare.

DULINVIE 2012

fracait parsore par lei miôr

PREMI FRIÛL: LA FARIE CREATIVE DE MUSICHE FURLANE

Al è jessût ta chestis zornadis il bant par partecipâ al Premi Friûl che, aromai di trente agns incà, al è la farie creative des novitâts musicâls par furlan. Il concors inmaneât di Radio Onde Furlane si insuaze tes azions promovudis dal progjet SUNS de ARLeF (Agjenzie Regjonâl pe Lenghe Furlane) e al va dilunc a pontâ sui grups zovins e su la sperimentazion intai gjenars musicâi plui atuâi, cu la convinzion che lenghe furlane e vedi di confrontâsi cence pôre cu la modernitât, di là di cierts stereotips che le volaressin peade a di un mont contadin che nol esist plui. Par partecipâ ae edizion dal 2012, i grups e/o i singui musiciscj a àn di mandâ dentri dai 15 di Jugn une cjançon compagnade dal so test (par furlan o intune altre lenghe minorizade dal Friûl). Framieç dal materiâl rivât a saran sielzûts tra i 3 e i 6 artiscj che a sunaran intant de finâl che e previôt une esibizion dal vîf di 15/20 minûts e che si tignarà ai 28 di Lui alì dal Parc dal Cormôr (Udin) inte suaze dal Homepage Festival. Come par solit, cui che al vinç il Premi Friûl al varà la pussibilitât di publicâ une sô  produzion discografiche pe etichete Musiche Furlane Fuarte. Dentri dal Premi Friûl però ancje chest an no podeve mancjâ une novitât. Cun di fat, dongje de sezion musiche si ‘nd à ancje une pai jingles radiofonics.  Cui che al vûl al pues partecipâ e creâ jingles gnûfs (di no plui di 30 seconts) pe “Radio libare dai furlans”. Ta chest câs la idee miôr e sarà premiade cuntun  iPad, simpri ai 28 di Lui alì dal Parc dal Cormôr, intant de finâl. Altris informazions su lis dôs sezions si cjatin sul sît www.ondefurlane.eu, là che si pues lei il bant e discjariâ la schede par partecipâ al concors. Cun di plui al è pront par saltâ fûr il cd di Ulisse e i Ciclopi, il grup rivelazion che al à vinçût la edizion passade dal Premi Friûl. I doi fantats (ghitare / batarie) di Mortean a àn produsût un cd di rock esplosîf che al supe tant dal blues des origjins che dal punk plui rumorôs, passant par scjassadis adrenalinichis e slambradis psichedelichis. Ancjemò une conferme, duncje, de funzion di scuvierte, produzion e promozion che il Premi Friûl al à vût e al à intal panorame musicâl furlan e plui in gjenerâl de culture furlane dal dì di vuê. Dai Mitli FLK a Lino Straulino, dai Arbe Garbe a DJ Tubet, juste par fâ cualchi non, ducj o cuasi a àn tacât dal Premi Friûl e di Radio Onde Furlane.

Par info telefonâ al 0432 530614 o scrivi a premifriul@ondefurlane.eu

SUNS, SCLESIS DI EUROPE: A UDIN LA FINÂL DAL LIET INTERNATIONAL 2011

SUNS Sclesis di Europe. Visions, musichis, peraulis ..... e ai 19 di novembar no stait a piardisi la finâl dal LIET INTERNATIONAL 2011, pe prime volte in Italie, pe prime volte in Friûl!

PIÇULIS GRANDIS LENGHIS A MUSICHE*MUZIKE

La manifestazion in lenghe furlane Musiche - Pe gnove musiche furlane, volude dal assessorât pe culture dal comun di Udin cul contribût di ARLeF (Agjenzie Regjonâl pe Lenghe Furlane), Provincie di Udin, Istitût pe Culture Slovene, e metût adun des cooperativis Il Campo e Informazione Friulana inte suaze dal progjet “Suns”, chest an e cambie muse. Cun di fat, la formule tradizionâl, che par agns e à alternât novitâts e vecjis gloriis dal panorame de musiche par furlan, e ven slargjade cu la presince inedite e une vore agradide di grups musicâi che a rivin de aree linguistiche slovene.
Al titul storic de manifestazion (“Musiche”, di intindisi inte sô ambivalence furlane e taliane) al è stât zontât ancje il sloven “Muzike” propit par marcâ la gnove muse de iniziative.
A testemoneance di cemût che lis lenghis no si fermin alì dai confins politics e nancje di chei artistics vinars ai 3 di Dicembar sul palc dal Palamostre di Udin, a tacâ des 9 di sere (21.00), o viodarìn duncje une daûr di chê altre trê formazions che, si ben che a rivin di Austrie, Slovenie e Italie, a cjantin dutis in lenghe slovene.
A vierzaran la serade i BK Evolution, formazion folk rock interessante che e rive des Valadis dal Nadison e che e je leade ae lungje esperience corâl dal Beneške Korenine. Ur vignarà daûr Tonç Feinig pianist sloven carinzian tra i plui cognossûts e preseâts dal jazz. In cheste ocasion al puartarà a Udin un progjet di stamp funk che al viôt la presince de cjantante Maya. Il grup plui spietât al sarà però chel dai Melodrom di Lubiane. Une realtât che, cul miscliç di une estetiche dark e di un sens melodic rafinât, al è di cualchi an incà un dai grups di ponte de sene alternative slovene. La lôr cjantante Mina e je ancje la vocalist dal storic grup di innomine mondiâl Laibach.
Sul finî di cheste prime serade a saran i R.esistence in Dub. La formazion Dub furlane, a pene tornade cuntun sucès de finâl dal Liet International, il festival european des cjançons in lenghe minoritarie, e varà il compit di sierâ te maniere miôr chest incuintri musicâl tra lenghe slovene e lenghe furlane.
Sabide ai 4 di Dicembar cun Musiche*, stes lûc e stes orari, si varà la vetrine aromai classiche des miôr novitâts discografichis dal an.
O viodarìn cussì i Nosisà che, a dîs agns juscj de ultime jessude discografiche, a son tornâts cu la lôr gnove produzion “Neri Cjarbon”. Dute di scuvierzi, invezit, la Orchestra Cortile, al lôr debut cun “Ondis di Glerie”. Nol podeve po mancjâ Lino Straulino cul so gnûf lavôr che lu viôt in vore cun vilotis classichis de tradizion furlane tornadis a lei cuntune vieste country-bluegrass.
Sul finî de serade fine e sarà dade fûr la targhe Deganutti premi pal miôr disc dal an sielt di un osservatori di gjornaliscj cualificâts e dedicât ae memorie dal innomenât gjornalist furlan.
A saurî inmò di plui la serade e sarà ancje la finâl, come par solit vivarose, cu lis novitâts puartadis dal Premi Friûl che chest an al mande sul palc cinc grups pardabon ferbints: Savac, Ad Plenitatem Lunae, Luna e un Quarto, Mig 29 Over Disneyland, Ulisse e i Ciclopi.
Dutis e dôs lis seradis a son cun jentrade libare. Di no pierdi!