27 DI FEVRÂR: LA ZORNADE FURLANE DAI DIRITS A ONDE FURLANE

Ai 27 di Fevrâr dal 1511 si invià il plui grant riviel popolâr furlan: un riviel che, massime tes campagnis, al cjapà sù un significât di rivendicazion dai “dirits antîcs” des comunitâts rurâls furlanis. Par cheste reson si à sielzût la date dai 27 di Fevrâr par celebrâ la Zornade Furlane dai Dirits. Zaromai di cualchi an Radio Onde Furlane e ufrìs ta chê zornade une programazion speciâl che si propon di stiçâ la riflession sui dirits dai furlans e su lis bataiis in vore par difindiju. La jentrade de Zornade e sarà curade di Mauro Missana, diretôr de emitente furlane, e di Carli Pup, puartevôs dal Comitât 482 che di passe dîs agns al è impegnât intal difindi I dirits linguistics e nazionâi des comunitâts dal Friûl, intant che Barbara Minen e proponarà une leture storiche dedicade ae rivolte furlane dal 1511. Dilunc vie de buinore si fasarà il pont sul rispiet dai dirits des comunitâts slovene e todescje dal Friûl in gracie des intervistis cun Luigia Negro (presidente provinciâl de SKGZ) e Velia Plozner (componente de Comission regjonâl pe minorance di lenghe todescje). Par chel che si riferìs ae situazion dai furlans, invezit, si proponarà un aprofondiment su la vicende de scuele di Migjee, câs evident di cemût che lis leçs su lis minorancis no son rispietadis; di chest si fevelarà cul sindic di chest Comun dal Friûl orientâl, Alberto Bergamin. Il toc centrâl de zornade, jenfri misdì e la une, al sarà po dedicât al teme dal lavôr e dai dirits dai lavoradôrs. Radio Onde Furlane a ‘nt fevelarà cun doi diviers aprofondiments, un su lis lotis pal lavôr intal Friûl di îr cuntune interviste di Adriano Venturini a Guerrino Cecotti, un dai protagoniscj des lotis dal Cormôr, e un altri dedicât ae situazion dal dì di vuê cuntune interviste fate di Lorenzo Fabbro al segretari gjenerâl de Cgil dal Friûl – Vignesie Julie, Franco Belci. Vie pal dopodimisdì, invezit, a laran in onde i aprofondiments dedicâts aes bataiis pe difese dal teritori furlan e al dirit des comunitât locâls di decidi di bessolis dal lôr svilup. Par mieç di une schirie di intervistis curadis di Mauro Missana e Pauli Cantarut si fevelarà di TAV cun Giancarlo Pastorutti (Comitâts No TAV de Basse furlane), di autostrade Cimpel–Secuals–Glemone cun Lucia D’Andrea (Comitât ARCA), di eletrodot Redipulie–Udin cun Aldevis Tibaldi (Comitât pe vite dal Friûl rurâl) e dal progjet par dopleâ la centrâl idroeletriche di Somplât cun Franceschino Barazzutti (Comitât pe tutele des aghis dal bacin montan dal Tiliment). Ai 27 di Fevrâr ancje la programazion musicâl di Onde Furlane e sarà speciâl cul miôr de musiche furlane e di altris nazionalitâts minorizadis, e cun programs di pueste curâts di Agnul Tomasin (cu la sô storiche trasmission Gerovinyl) e di Carli Pup (che al fevelarà invezit de “bande sonore” des rivoltis e des protestis che a àn scjassât il mont tal ultin an).

Buine scolte e buine Zornade Furlane dai Dirits a ducj.

27 DI FEVRÂR 1511 - 27 FEVRÂR 2011

"e jo no, no pensi nuie di vô bulo cortesan

o ai in cûl la vuestre entrade us refudi il vuestri pan"

Dirits dineâts fûcs impiâts

BON 27 DI FEVRÂR A DUTIS/DUCJ

27 DI FEVRÂR: LA ZORNADE FURLANE DAI DIRITS A ONDE FURLANE

7 di Fevrâr: la Zornade Furlane dai Dirits a Onde Furlane. Un speciâl prime de riduzion dai programs de radio
500 agns indaûr, ai 27 di Fevrâr dal 1511, si invià il riviel plui grant de storie furlane. Dâts dongje in bandis di vuerilie, i contadins a derin l’assalt e a brusarin i cjistiei e i palaçs de nobiltât ator par dute la Patrie dal Friûl. La insurezion e judà a infuartî la cussience des comunitâts rurâls furlanis che, contrari di ce che cualchidun al va dilunc a contâ, no jerin pipinots mugnestris tes mans dai sorestants di in chê volte, ma sogjets impegnâts intune lungje lote par difindi i lôr dirits. Par chest si à sielzût la date dai 27 di Fevrâr par celebrâ la Zornade Furlane dai Dirits. Zaromai di un pôcs di agns, Radio Onde Furlane, cu la poie dal Comitât 482, e celebre cheste Zornade cuntune programazion speciâl che e à chê di stiçâ la riflession sui dirits dai furlans e su lis bataiis inviadis par difindiju. Cun di plui, intal inovâl pai 500 agns dal riviel, a dâ une man pe iniziative e sarà ancje la Associazion 1511. Si trate dal ultin sfuarç che la storiche emitente furlane e fâs prime di une riduzion gruesse de sô programazion, che e jentrarà in vore cui 28 di Fevrâr. Une decision leade al tai pesant di risorsis pe lenghe furlane che la aministrazion regjonâl e à metût in at pal secont an di file e che za cul prin di Fevrâr e à obleât Onde Furlane a cjapâ la strade de casse integrazion pai siei dipendents. Dut câs la voie di lotâ par tignî in pîts cheste esperience e reste fuarte e si vûl marcâle ancje cu la iniziative de Zornade Furlane dai Dirits. La jentrade de Zornade, a tacâ des 8 e mieze, e sarà curade dal diretôr de Radio, Mauro Missana, e dal puartevôs dal president de Associazion 1511, Carli Pup. Simpri vie pe buinore, di 10 e mieze indenant, si fasarà il pont sul stât dai dirits linguistics e nazionâi dai furlans e di chês altris comunitâts minorizadis dal Friûl in gracie des intervistis cun Donato Toffoli (Comitât Tecnic Sientific de ARLeF), Luigia Negro (presidente provinciâl de SKGZ) e Lucia Protto (presidente dal circul culturâl “F. Schneider” di Sauris). La part de programazion dedicade ai aprofondiments storics e sarà svilupade su doi moments diferents: a 9 di buinore une analisi sul riviel e su lis sôs lidrîs cul professôr Furio Bianco de Universitât dal Friûl e cu la professore Donata Degrassi de Universitât di Triest; e po, a 3 dopomisdì, une leture storiche sul argoment. A misdì Mauro Missana e Paolo Cantarutti a metaran adun un speciâl dal “Ce fâ” dut dedicât ai apontaments in program sul teritori pai 500 agns dal riviel de Joibe Grasse. A misdì e mieç e larà in onde une trasmission par fâ il pont su la situazion de politiche linguistiche regjonâl, massime par chel che al tocje l’azerament pal secont an di file des risorsis pai programs radiotelevisîfs par furlan: une des resons che a àn obleât a meti in at la casse integrazion ancje a Onde Furlane e a taiâ in maniere marcade la sô programazion. Di chest a fevelaran Mauro Missana, Paolo Cantarutti, Lorenzo Fabbro e Guglielmo Pitzalis e altris ospits. Vie pal dopomisdì, invezit, di 3 e mieze indenant, a laran in onde i aprofondiments su dirits specifics. Si fevelarà di lavôr cun Gianpaolo Roccasalva (segretari regjonâl de FIOM), difese dal teritori cun Paolo De Toni (rapresentant storic dal ambientalisim furlan), autoguvier cun Giorgio Cavallo (president regjonâl di Legambiente e ex aministradôr), e tutele dal ambient cun Roberto Pizzutti (segretari regjonâl dal WWF). Ai 27 di Fevrâr ancje la programazion musicâl di Onde Furlane e sarà speciâl cul miôr de musiche furlane e di altris nazionalitâts minorizadis, e cu la trasmission di pueste curade di Mojra B (in onde la matine a 9 e mieze e po in repliche tal dopomisdì a 5 e mieze). Su la programazion a àn po lavorât tant che condutôrs Piero Cargnelutti, Isabelle Grattoni e Enrico Turloni; Barbara Minen pes leturis e Francesca Lionetti pe regjie. Buine scolte e buine Zornade Furlane dai Dirits a ducj.