JACUME: RATIFICADE LA CJARTE EUROPEANE PES LENGHIS DI BANDE DAL GUVIER TALIAN

Ripuartin la notizie dal blog dal Comitât 482:

Intant de riunion dal Consei dai ministris di îr, tra la istituzion de fieste pal inovâl de "unitât de Italie", l'aument dai podês dal esecutîf e un percors facilitât pal cumierç di armis, il guvier Monti al à ratificade la Cjarte europeane pes lenghis regjonâls o minoritariis (1992). Si trate di un dai documents di fonde pal rispiet dai dirits linguistics des comunitâts minorizadis che il stât talian al veve firmât agns indaûr, ma nol veve po ratificât. Là che, la mancjance de ratifiche, e impedive di meti in vore i principis de Cjarte intal stât talian. Tant par fâ un esempli, la mancjance de ratifiche e jere stade doprade (in maniere dal dut strumentâl e cence fondis) par motivâ il fat che la RAI no meteve in vore la leç statâl 482/99 che e garantìs spazis pes lenghis minoritariis ricognossudis dentri dal servizi radiotelevisîf public. A son coventâts cetancj agns, ma cumò la ratifiche de Cjarte e je rivade: jacume! Magari cussì no, cheste biele gnove e rive distès a lassânus la bocje garbe. Cun di fat, cemût si podaraial rispietâ i principis e i contignûts de Cjarte cuant che il strument principâl par fâlu, ven a dî - daûr des stessis peraulis jessudis îr de bocje dai rapresentants dal guvier talian - la leç statâl 482/99, al è aromai cuasi cence risorsis propit par vie dai tais decidûts dal guvier Monti? Chel istès, par cjalâ chê altre muse de medaie, o podìn dî che cu la ratifiche de Cjarte o vin une arme in plui pe nestre lote e, pôc ma sigûr, no mancjarìn di doprâle.

COMUNICÂT DAL COMITÂT 482 CUN RIVUART AI FONTS PE LEÇ 482/99: O SIN AE FARSE!

Juste cumò il Dipartiment pai afârs regjonâi de Presidence dal Consei dai Ministris al à dât fûr la circolâr su la assegnazion dai fonts previodûts de leç statâl 482/99 pal 2012 (ancje se formalmentri a son calcolâts pal 2011) e il cuadri che indi ven fûr al è di sgrisulâsi. Cun di fat, i bêçs metûts par dutis lis dodis comunitâts minorizadis ricognossudis dal Stât talian cu la 482 a son juste 1.768.792 euros. Di chescj a rivaran inte Regjon autonome Friûl – Vignesie Julie 362.200 euros: 240.608 pal furlan, 108.605 pal sloven e 12.987 pal todesc.

Il Guvier Monti, tal cidin plui totâl, al à rivât a fâ fintremai piês di chel che al veve fat il Guvier Berlusconi tal 2010 cuant che par garantî i dirits linguistics des dodis minorancis ricognossudis a jerin stâts metûts sì e no 2 milions di euros e al Friûl – Vignesie Julie i jerin rivâts uns 465 mil euros. No sin nancje a di un sest des risorsis dadis fûr pôcs agns indaûr…

Prime o vin vût di spietâ passe cincuante agns par che si des forme a un dai principis di fonde de Costituzion republicane (art. 6) par mieç de leç statâl 482. Po, passâts plui di dîs agns che chê leç e je stade fate buine, o sin inmò che o spietìn che e tancj dai siei contignûts a sedin metûts in vore. Cumò lis risorsis plui che scjarsis metudis dai diviers guviers talians par meti in vore la 482 a deventin juste fruçons. Si disarà che, in timps di crisi, ducj a àn di meti dal lôr. Nô invezit si domandìn parcè che a paiâ a àn di jessi simpri chei. Il Guvier, di fat, al spint di plui par fâ svolâ par dîs oris un cjacebombardîr Tornado che no par garantî, par un an a dilunc, i dirits linguistics di furlans, slovens e todescs dal Friûl – Vignesie Julie: o sin pardabon rivâts ae farse!

Al è pussibil che cualchidun, un tic dûr di çucje, al contindi che a son lis autoritâts europeanis a domandânus chescj sacrificis. Alore ur ricuardìn che te “Tierce Opinion su la Italie” dade fûr l’an passât dal Consei de Europe su la metude in vore de Convenzion cuadri pe protezion des minorancis nazionâls si diseve a clâr che za ta chê volte i tais fats a riscjavin di vê “consecuencis une vore seriis pes minorancis” e che a jerin plui che justificadis lis pôris di cui che, a tacâ dai furlans, si viodeve intai fats impedît di “promovi pardabon i dirits dai membris di chestis comunitâts”.

Se e je vere che aromai la uniche reson par difindi la specialitât dal Friûl – Vignesie Julie e je la presince maioritarie di comunitâts che a fevelin une lenghe proprie divierse di chê dal Stât, ancje su la fonde di cheste ultime maçade che nus àn dât, al devente sante scugne che i rapresentants de nestre Regjon a tratin cun Rome il trasferiment totâl des competencis e des risorsis par cierts setôrs a tacâ propit de difese e de promozion des lenghis minorizadis e de organizazion scolastiche (il câs di Migjee – passaitnus il zûc di peraulis – al fâs scuele!). Cuale ocasion miôr par fâlu de taule di lavôr Stât – Regjon che e varès di nassi dopo dal incuintri a pene stât tra il president dal Guvier talian Mario Monti e chel regjonâl Renzo Tondo? Al è in zûc l’interès coletîf des nestris comunitâts. Par chest o sperìn che Zonte e Consei regjonâl dal Friûl – Vignesie Julie, adun cui parlamentârs elets inte nestre regjon, a lassin di bande i prejudizis ideologjics e a tachin a batisi pai nestris dirits denant dal guvier talian.

Udin, 04/02/2012

Il puartevôs dal Comitât – Odbor – Komitaat – Comitato 482

Carli Pup

COMITÂT PE AUTONOMIE E PAL RILANÇ DAL FRIÛL E COMITÂT 482: POLITICHIS PAL FURLAN, LA SITUAZION E JE GRIVIE, LIS RESPONSABILITÂTS CLARIS

Dopo lis iniziativis (1 - 2) dal Partît Democratic rivuart ai inadempiments de aministrazion regjonâl di centri drete in riferiment aes politichis linguistichis pal furlan e ae mancjade aplicazion de Leç Regjonâl 29/2007 lis critichis e son stadis ribatudis, dilunc di une conference stampe inmaneade martars stât intal palaç de regjon a Udin, ancje di doi sogjets impuartants tant che il Comitât pe Autonomie e il rilanç dal Friûl e il Comitât 482. Par restâ in argoment lait a lei ca un intervent di Lorenzo Fabbro, component de segreterie provinciâl dal Pd, che al interven in particolâr sul cantin de presince de lenghe sui media e sul contrat di servizi rai e ca la notizie di une interpelance presentade dal conseîr regjonâl dal Pd Mauro Travanut in riferiment ae propueste, une vore preocupante, di stravuelzi la impostazion de Arlef midiant modifichis al statût che e proviodin di trasferî il podê di indreçament des politichis linguistichis dal Comitât Tecnic Sientific (organisim formât di esperts) al Consei di Aministrazion (organisim di nomine politiche direte) cul risi di incressi inmò di plui il podê discrezionâl dai politics inte programazion e intal finanziament dai progjets pal furlan.

27 DI FEVRÂR: LA ZORNADE FURLANE DAI DIRITS A ONDE FURLANE

7 di Fevrâr: la Zornade Furlane dai Dirits a Onde Furlane. Un speciâl prime de riduzion dai programs de radio
500 agns indaûr, ai 27 di Fevrâr dal 1511, si invià il riviel plui grant de storie furlane. Dâts dongje in bandis di vuerilie, i contadins a derin l’assalt e a brusarin i cjistiei e i palaçs de nobiltât ator par dute la Patrie dal Friûl. La insurezion e judà a infuartî la cussience des comunitâts rurâls furlanis che, contrari di ce che cualchidun al va dilunc a contâ, no jerin pipinots mugnestris tes mans dai sorestants di in chê volte, ma sogjets impegnâts intune lungje lote par difindi i lôr dirits. Par chest si à sielzût la date dai 27 di Fevrâr par celebrâ la Zornade Furlane dai Dirits. Zaromai di un pôcs di agns, Radio Onde Furlane, cu la poie dal Comitât 482, e celebre cheste Zornade cuntune programazion speciâl che e à chê di stiçâ la riflession sui dirits dai furlans e su lis bataiis inviadis par difindiju. Cun di plui, intal inovâl pai 500 agns dal riviel, a dâ une man pe iniziative e sarà ancje la Associazion 1511. Si trate dal ultin sfuarç che la storiche emitente furlane e fâs prime di une riduzion gruesse de sô programazion, che e jentrarà in vore cui 28 di Fevrâr. Une decision leade al tai pesant di risorsis pe lenghe furlane che la aministrazion regjonâl e à metût in at pal secont an di file e che za cul prin di Fevrâr e à obleât Onde Furlane a cjapâ la strade de casse integrazion pai siei dipendents. Dut câs la voie di lotâ par tignî in pîts cheste esperience e reste fuarte e si vûl marcâle ancje cu la iniziative de Zornade Furlane dai Dirits. La jentrade de Zornade, a tacâ des 8 e mieze, e sarà curade dal diretôr de Radio, Mauro Missana, e dal puartevôs dal president de Associazion 1511, Carli Pup. Simpri vie pe buinore, di 10 e mieze indenant, si fasarà il pont sul stât dai dirits linguistics e nazionâi dai furlans e di chês altris comunitâts minorizadis dal Friûl in gracie des intervistis cun Donato Toffoli (Comitât Tecnic Sientific de ARLeF), Luigia Negro (presidente provinciâl de SKGZ) e Lucia Protto (presidente dal circul culturâl “F. Schneider” di Sauris). La part de programazion dedicade ai aprofondiments storics e sarà svilupade su doi moments diferents: a 9 di buinore une analisi sul riviel e su lis sôs lidrîs cul professôr Furio Bianco de Universitât dal Friûl e cu la professore Donata Degrassi de Universitât di Triest; e po, a 3 dopomisdì, une leture storiche sul argoment. A misdì Mauro Missana e Paolo Cantarutti a metaran adun un speciâl dal “Ce fâ” dut dedicât ai apontaments in program sul teritori pai 500 agns dal riviel de Joibe Grasse. A misdì e mieç e larà in onde une trasmission par fâ il pont su la situazion de politiche linguistiche regjonâl, massime par chel che al tocje l’azerament pal secont an di file des risorsis pai programs radiotelevisîfs par furlan: une des resons che a àn obleât a meti in at la casse integrazion ancje a Onde Furlane e a taiâ in maniere marcade la sô programazion. Di chest a fevelaran Mauro Missana, Paolo Cantarutti, Lorenzo Fabbro e Guglielmo Pitzalis e altris ospits. Vie pal dopomisdì, invezit, di 3 e mieze indenant, a laran in onde i aprofondiments su dirits specifics. Si fevelarà di lavôr cun Gianpaolo Roccasalva (segretari regjonâl de FIOM), difese dal teritori cun Paolo De Toni (rapresentant storic dal ambientalisim furlan), autoguvier cun Giorgio Cavallo (president regjonâl di Legambiente e ex aministradôr), e tutele dal ambient cun Roberto Pizzutti (segretari regjonâl dal WWF). Ai 27 di Fevrâr ancje la programazion musicâl di Onde Furlane e sarà speciâl cul miôr de musiche furlane e di altris nazionalitâts minorizadis, e cu la trasmission di pueste curade di Mojra B (in onde la matine a 9 e mieze e po in repliche tal dopomisdì a 5 e mieze). Su la programazion a àn po lavorât tant che condutôrs Piero Cargnelutti, Isabelle Grattoni e Enrico Turloni; Barbara Minen pes leturis e Francesca Lionetti pe regjie. Buine scolte e buine Zornade Furlane dai Dirits a ducj.