SABIDE RIVIEI DI INGJUSTRI A UDIN E VINO DI LEI A MUÇANE

Doi apontaments culturâi impuartants par sabide ai 21 di mai.
A Udin, aes sîs e mieze sot sere (18.30) alì de sale esposizions dal Visionario di Udin si scree “Riviei di ingjustri”, la mostre des taulis origjinâls dai fumuts che a àn partecipât ae edizion 2010 dal Premi Friûl. La iniziative, che si insuaze intal program udinês pai cinccent agns dal riviel de Joibe Grasse, e je inmaneade de cooperative Informazione Friulana / Radio Onde Furlane e de Associazion 1511 cu la poie dal Assessorât pe Culture dal Comun di Udin e cu la colaborazion dal Visionario / Centro per le arti visive.
Dentri di “Riviei di ingjustri” si podaran viodi lis taulis origjinâls dissegnadis di diviers autôrs furlans (Guido Carrara; Lorenzo Manià; Nicola Angeli e Fabio Varnerin; Emilio Bertossi; Eleonora Spizzamiglio; Enrico Tomasi; progjet MaMaRuTo) pal Premi Friûl di Radio Onde Furlane e dedicadis al riviel de Joibe Grasse dal 1511. Dongje di chestis oparis, a saran metudis fûr ancje des taulis origjinâls di Luigino Peressini che, cul so “Vitis di un vilan salvadi”, al è stât il prin a cubiâ fumuts e Joibe Grasse dal 1511. In plui di cualchi taule di chel lavôr, si podarà viodi ancje la mape su la Joibe Grasse fate dal stes Peressini pai cinccent agns dal riviel.
A compagnâ lis contis a fumuts si varan ancje des notis storics là che a son presentadis lis causis dal riviel, il so svilup e cualchi considerazion su la plui grande insurezion popolâr de storie furlane. Intant de scree, là che a saran organizadôrs e autôrs, si presentarà ancje la publicazion che e met adun lis siet contis a fumuts in vision alì dal Visionario. La mostre e restarà vierte fin ai 11 di Jugn cui oraris de sale esposizions dal Visionario, ven a dî plui o mancul di cuatri tal dopodimisdì a nûf e mieze di sere (16.00-21.30).
Te Basse, a Muçane, il circul culturâl Artetica al presente il secont apontament de rassegne “Vino di Lei 2011”, presentazions di libris e vins intai zardins di Muçane. Aes 18.30, cheste volte intal zardin de famee Turco Bruno (in via Molino) al vignarà presentât il libri di Emanuele Tonon “Il nemico”. L’autôr al sarà presentât di Pauli Cantarut. Il vin presentât pe ocasion al sarà chel de cantine Riz Paolo di Brazzan di Cormons.

27 DI FEVRÂR: LA ZORNADE FURLANE DAI DIRITS A ONDE FURLANE

7 di Fevrâr: la Zornade Furlane dai Dirits a Onde Furlane. Un speciâl prime de riduzion dai programs de radio
500 agns indaûr, ai 27 di Fevrâr dal 1511, si invià il riviel plui grant de storie furlane. Dâts dongje in bandis di vuerilie, i contadins a derin l’assalt e a brusarin i cjistiei e i palaçs de nobiltât ator par dute la Patrie dal Friûl. La insurezion e judà a infuartî la cussience des comunitâts rurâls furlanis che, contrari di ce che cualchidun al va dilunc a contâ, no jerin pipinots mugnestris tes mans dai sorestants di in chê volte, ma sogjets impegnâts intune lungje lote par difindi i lôr dirits. Par chest si à sielzût la date dai 27 di Fevrâr par celebrâ la Zornade Furlane dai Dirits. Zaromai di un pôcs di agns, Radio Onde Furlane, cu la poie dal Comitât 482, e celebre cheste Zornade cuntune programazion speciâl che e à chê di stiçâ la riflession sui dirits dai furlans e su lis bataiis inviadis par difindiju. Cun di plui, intal inovâl pai 500 agns dal riviel, a dâ une man pe iniziative e sarà ancje la Associazion 1511. Si trate dal ultin sfuarç che la storiche emitente furlane e fâs prime di une riduzion gruesse de sô programazion, che e jentrarà in vore cui 28 di Fevrâr. Une decision leade al tai pesant di risorsis pe lenghe furlane che la aministrazion regjonâl e à metût in at pal secont an di file e che za cul prin di Fevrâr e à obleât Onde Furlane a cjapâ la strade de casse integrazion pai siei dipendents. Dut câs la voie di lotâ par tignî in pîts cheste esperience e reste fuarte e si vûl marcâle ancje cu la iniziative de Zornade Furlane dai Dirits. La jentrade de Zornade, a tacâ des 8 e mieze, e sarà curade dal diretôr de Radio, Mauro Missana, e dal puartevôs dal president de Associazion 1511, Carli Pup. Simpri vie pe buinore, di 10 e mieze indenant, si fasarà il pont sul stât dai dirits linguistics e nazionâi dai furlans e di chês altris comunitâts minorizadis dal Friûl in gracie des intervistis cun Donato Toffoli (Comitât Tecnic Sientific de ARLeF), Luigia Negro (presidente provinciâl de SKGZ) e Lucia Protto (presidente dal circul culturâl “F. Schneider” di Sauris). La part de programazion dedicade ai aprofondiments storics e sarà svilupade su doi moments diferents: a 9 di buinore une analisi sul riviel e su lis sôs lidrîs cul professôr Furio Bianco de Universitât dal Friûl e cu la professore Donata Degrassi de Universitât di Triest; e po, a 3 dopomisdì, une leture storiche sul argoment. A misdì Mauro Missana e Paolo Cantarutti a metaran adun un speciâl dal “Ce fâ” dut dedicât ai apontaments in program sul teritori pai 500 agns dal riviel de Joibe Grasse. A misdì e mieç e larà in onde une trasmission par fâ il pont su la situazion de politiche linguistiche regjonâl, massime par chel che al tocje l’azerament pal secont an di file des risorsis pai programs radiotelevisîfs par furlan: une des resons che a àn obleât a meti in at la casse integrazion ancje a Onde Furlane e a taiâ in maniere marcade la sô programazion. Di chest a fevelaran Mauro Missana, Paolo Cantarutti, Lorenzo Fabbro e Guglielmo Pitzalis e altris ospits. Vie pal dopomisdì, invezit, di 3 e mieze indenant, a laran in onde i aprofondiments su dirits specifics. Si fevelarà di lavôr cun Gianpaolo Roccasalva (segretari regjonâl de FIOM), difese dal teritori cun Paolo De Toni (rapresentant storic dal ambientalisim furlan), autoguvier cun Giorgio Cavallo (president regjonâl di Legambiente e ex aministradôr), e tutele dal ambient cun Roberto Pizzutti (segretari regjonâl dal WWF). Ai 27 di Fevrâr ancje la programazion musicâl di Onde Furlane e sarà speciâl cul miôr de musiche furlane e di altris nazionalitâts minorizadis, e cu la trasmission di pueste curade di Mojra B (in onde la matine a 9 e mieze e po in repliche tal dopomisdì a 5 e mieze). Su la programazion a àn po lavorât tant che condutôrs Piero Cargnelutti, Isabelle Grattoni e Enrico Turloni; Barbara Minen pes leturis e Francesca Lionetti pe regjie. Buine scolte e buine Zornade Furlane dai Dirits a ducj.

1511-2011 DIRITS DINEÂTS FÛCS IMPIÂTS

Al è in vore il gnûf blog http://www.associazion1511.blogspot.com/
Le Associazion 1511 e à chê di fâ cognossi il riviel popolâr furlan de Joibe Grasse dal 1511 e altris episodis di ribelisim che a àn segnât la storie dal Friûl e, di chê strade, di stiçâ la riflession su la influence che a àn vût o che a puedin vê pe identitât furlane.