Isulisdi Stiefin Morat
presentazion e leturis a cure di Pauli Cantarut e dal autôr
musiche cun Ulysse e i Ciclopi
Tal oratori di San Pauli (Morsan des Ocjis - PN)
Joibe ai 10 di jugn 2010 a lis 9 di sere
… là che linie dal timon e je sirene
viaç che nol à cjarte
distin che al incjadene…
1 commento:
Stiefin Morat al someave sparît intal nuie, cuntune mosse ae J.D. Salinger, l'autôr dal romanç “Donald dal Tiliment”, jessût tal 2000 e seguitât di une provocatorie riduzion radiofoniche firmade di Renato Rinaldi pe RAI regjonâl intal 2007.
Un romanç, che al è stât une sorte di spartiaghis inte leterature furlane contemporanie, pal teme e pe elaborazion linguistiche, al someave aromai no vê plui un seguit ma l'autôr al è tornât cumò, dopo 10 agns, pe curiositât dai letôrs cuntun volum di poesiis intitulât “Isulis”, publicât de cjase editore Kappa Vu inte golaine “Discanto”.
In realtât Morat nol à mai molât dal dut di proponi jessudis poetichis dal vîf cu la “posse” dai Trastolons (Lussia di Uanis, Fabian Riz, Guido Carrara, Maurizi Mattiuzza, Raff BB Lazzara), cu la lôr lenghe furlane caraibiche e musicâl, baste pensâ ai lavôrs coletîfs “Tons Trastolons” e “Tananai” e ai cd publicâts dai diviers membris dal grup cu la colaborazion di musiciscj tant che Lino Straulino, Loris Vescovo, Arbe Garbe etc., ma chest gnûf lavôr al rint merit ae ispirazion poetiche di Moratto che al à componût une sorte di poeme incentrât sul topos leterari e simbolic de isule, che no je ne tiere ne mâr e e vîf separade dal mont e dal so fluî, petrificade intes pussibilitâts e simpri inaltrò a pet de norme, dal dât, des robis. Il control e la inovazion che Morat al incalme su la lenghe furlane a àn il podê di traspuartâ il letôr intun continui pierdisi e cjatâsi fûr, tra tiere e aghe, tra jessi e divignî, fasint di cheste opare pardabon alc di preseâ.
E propit a Sant Pauli, che isule e je stade pardabon, par dut il '600, cuant che il Tiliment al veve sierât il paîs fra doi rams di aghe, al sarà presentât il volum
joibe ai 10 di Jugn, aes 21.00
li dal oratori parochiâl. L'autôr al leiarà lis sôs poesiis e al dialogarà cul curadôr Pauli Cantarut, acompagnâts de musiche dai zovins ribei dal rock'n'roll furlan Ulysse e i Ciclopis.
Posta un commento