IL CORAÇ E LA COERENCE NO SI VENDIN AL MARCJÂT. PDL, LEGHE E ALEANCE PAR BORDIN: BARUFIS E ACUARDI AL ULTIN MINÛT?

Pdl e Leghe viers un acuardi eletorâl al anuncie il titul di un articul sul Messaggero di îr. Al sarà ancje cussì ae fin ma dome par mancjance di coraç e di coerence politiche. Dividûts su dut, rapuarts personâi al limit de insoference ma ae fin ducj tacâts ae poltrone, l'uniche, vere cole che e ten adun la maiorance. Invezit di cjapâ at des divisions politichis e personâls e lâ ognidun pe sô strade e discutin de composizion de zonte (poltronis); il Pdl al volarès cuatri assessôrs, la civiche Alleanza per Bordin a no volarès Zoroddu, Bordin al è disponibil a gloti cuasi dut e al tente di mediâ jenfri posizions inconciliabilis. Acuardi al ultin minût? Pussibil, ma dome parcè che e mancje un tic di dignitât politiche.