Carli Pup de redazion gjornalistiche di Radio Onde Furlane nus segnale la trasmission che e larà in onde sabide ai 7 di Avrîl – tor 9 e 35 di matine - sui 90.00 Mhz di Radio Onde Furlane (o in streaming dal sît www.ondefurlane.eu ). Il program al nas dal lavôr “Repressione antipartigiana in Friuli. La Caserma ‘Piave’ di Palmanova e i processi del dopoguerra” di Irene Bolzon, publicât che al è pôc de cjase editore Kappa Vu di Udin e che o vin presentât la setemane passade al Marinaretto di Palaçûl inte suaze de rassegne de Anpi "Resistenze".
La repression cuintri dal moviment partigjan e de popolazion civîl puartade indenant dai reparts logâts a Palme (a tacâ des SS talianis e de Milizie di Difese Teritoriâl), i procès cuintri dai responsabii di chês violencis, la memorie storiche di chei fats (in cierts câs rimovude o strassomeade) a saran duncje i temis frontâts dilunc vie de trasmission. Par fevelâ di chescj argoments a saran in studi Irene Bolzon, autore dal libri e impegnade intun impuartant lavôr di ricercje storiche su chei fats, Alessandra Kersevan, editore e storiche, e Valerio Battistella, testemoni diret des violencis des bandis nazifassistis che a operavin inte Basse furlane. Te foto la presentazion dal Marinaretto cun Alessandra Kersevan, Irene Bolzon e Lorenzo Fabbro.
Nessun commento:
Posta un commento