GNOVIS DE CAMPAGNE "L'ITALIA SONO ANCH'IO"

Si sta inviant viers la conclusion la Campagne Nazionâl pai dirits di citadinance "L'Italia sono anch'io". Ancje  te nestre Regjon il Comitât pal Friûl-Vignesie Julie al à tirât sù lis firmis a sostegn di dôs propuestis di leç di iniziative popolâr: "Normis pe partecipazion politiche e aministrative e pal dirit di eletorât cence discriminazions di citadinance e nazionalitât" e modifichis ae leç N.91/92 "Gnovis normis di citadinance". Joibe stât il responsabil imigrazion de segretarie provinciâl dal Partît Democratic Lorenzo Fabbro al à consegnât ai rapresentants dal Comitât, li de Cgil di Udin, plui di 600 firmis cjapadis sù dilunc di une schirie di iniziativis inmaneadis sul teritori di bande dal Pd. Te stesse ocasion, Fabbro e il segretari provinciâl Andrea Lerussi e an pandût la condivision dal partît cun rivuart ae manifestazion organizade dai sindacâts par protestâ cuintri la gnove tasse par rignuvî il permès di permanence. Lei il comunicât sul sît dal Pd provinciâl.

INCUINTRI PUBLIC A TRIVIGNAN SUL TEME DE RIFORME DES PENSIONS

I Circui dal Partît Democratic di Trivignan e Cjopris Viscon us invidin a partecipâ al incuintri public "La riforme des pensions: lis pensions di vuê e chês di doman...." che si davuelzarà joibe ai 31 di març lì da lis ex scuelis di Clauian.
Si proviodin intervents di Andrea Simone Lerussi, segretari provinciâl dal PD di Udin e di Danilo Margheritta, diretôr dal patronât INCA - CGIL.

LA ZONTE TONDO NUS TAIE LA LENGHE: CONFERENCE STAMPE DAL PD

Lunis ai 24 di zenâr, aes 14.30, alì de Sale Svevo, Palaç de Regjon in Vie Sabbadini a Udin, si davuelzarà une conference stampe dal Partît Democratic dal Friûl-Vignesie Julie cun rivuart aes politichis linguistichis de zonte regjonâl pe lenghe furlane.
E parteciparan al incuintri Debora Serracchiani, europarlamentâr e segretarie regjonâl dal Pd, Mauro Travanut, vice cjâf grup dal Pd in consei regjonâl, Francesco Martines, cjâf grup dal Pd in consei provinciâl, Andrea Simone Lerussi, segretari provinciâl dal Pd e Lorenzo Fabbro, component de segretarie provinciâl di Udin.
Jenfri i ponts al ordin dal dì la pesante riduzion des risorsis e la scancelazion dei lenghe furlane intal setôr dai media intal belanç 2011, la assence di une linie strategjiche tes politichis linguistichis e, daspò trê agns de aprovazion, la mancjade atuazion de leç regjonâl 29/07.

Lei la cronache de conference stampe sul Gazzettino e sul Messaggero Veneto .