Dilunc la fieste di S. Antoni a Palaçûl, sot dal tendon des associazions di volontariât (Protezion civîl, Auser, Aism, Ana e altris) e vignaràn propuestis dôs seradis cu le colaborazion di Radio Onde Furlane. Onde Furlane e je une radio nassude intal 1980 cun chê di valorizâ e di difindi il teritori, la culture e lis lenghis dal Friûl. Di 30 agns Radio Onde Furlane e jentre ogni dì intes cjasis dai furlans par informâju e par fâur cognossi dutis lis musis dal Friûl. Pal inovâl dai 30 agns Onde Furlane e torne sul teritori cuntune schirie di apontaments, “Radio Ator”, cun chê di proponi tematichis e stiçâ riflessions. L’identitât e lis lenghis, l’ambient e il teritori, la politiche e l’economie, la culture e la scuele, i rapuarts emigrazion/imigrazion e i cambiaments de societât e son sigurementri cuestions ator des cualis rifleti sul Friûl che a nol è plui, sul Friûl che al cambie, sul Friûl che o volìn fâ sù pal doman. A Palaçûl sabide ai 5 di jugn, a lis 21.00, sot dal tendon des associazions Adriano Venturini e Lorenzo Fabbro e presentaran une schirie di contribûts e video intervistis sul teme ambientâl e sul rapuart jenfri il paisaç e l’identitât “Teritori, paisaç e identitât: storiis di aghis, prâts, morârs e fossâi” mentri il sabide seguitîf, ae stesse ore, “Radio Ator” e sarâ di gnûf a Palaçûl par fevelâ inmò di ambient e il titul de serade al sarà “Teritori, paisaç e identitât: storiis di oms e di aghis, il flum Stele” un viaç jenfri aghis, memorie, atualitât e storiis incredibilis e scuasit dismenteadis contadis de vive vôs dai protagoniscj.
