INCUINTRIS PUBLICS INTAI COMUNS DE UNION CÛR DAL STELE

Us segnalin trê iniziativis di sigûr interès ancje parcè che i temas in discussion e saran sigurementri al centri dal dibatit eletorâl a Pucinie (e no dome).

I conseîrs de Union Cûr dal Stele jenfri i Comuns di Rivignan, Teôr e Pucinie Battistutta, Odorico, Papais, Cosmi, Masolin e Colle e organizin trê incuintris publics cun rivuart ae introduzion de gnove impueste municipâl –IMU- e ae ipotesi di fusion dai trê comuns.

Apontament par miercus ai 11 di avrîl, a lis 21.00, alì dal Auditorium Comunâl di Rivignan pe prime serade; la dì dopo, joibe ai 12 di avrîl, simpri a lis 21.00, alì dal centri Civic di Teôr par finî, vinars ai 13 di avrîl, stesse ore, intal Centri Polifunzionâl di Pucinie. (te foto, gjavade dal blog www.pocenia.blogspot.com, al centri, il conseîr di Rivignan Paolo Battistutta)

AMINISTRAZION, AMBIENT E TERITORI: CUÂL FUTÛR PE UNION CUORE DELLO STELLA? E SE O SCOMENÇASSIN A PENSÂ PLUI IN GRANT?

Silvio Bini sul Gazzettino dal 1 di setembar al ripuarte la croniche di une assemblee, inmaneade a Pucinie dal comitât civic di Giovanni Forni, par discuti de fusion dai comuns di Pucinie, Rivignan e Teôr daspò di sîs agns di vite de Union Cuore dello Stella. Un tic di confusion sul futûr e pôc coraç di bande dai aministradôrs (la miôr provocazion de serade pal gjornalist e je stade che dal ex sindic di Palaçûl Lorenzo Fabbro: il rilanç dal parc dal Stele e  une gjestion aministrative uniche di ducj i comuns partint di Rivignan par rivâ a Prissinins). Viodût che a Pucinie si votarà l'an che al ven o tornarin prest a fevelâ di chest cantin che, in efiets, al è di grandissime impuartance par dut il nestri teritori. Îr, ancje il Messaggero al à publicât une pagjine interie al argoment de fusion dai comuns de Union Cuore dello Stella.

P.s. Te prime part de riunion di Pucinie, par stesse amission dal Sindic, o vin ancje discuviert che a Torse a nol esist un depuradôr in funzion e duncje tancj di lôr e discjamin diretementri aghis no depuradis intal flum Stele. La robe no va nuie ben e ancje su chest argoment (za frontât plui voltis in consei comunâl a Palaçûl par stiçâ i nestris sorestants a fâ alc cuintri l'incuinament - viôt i report di Goletta Verde dai ultins agns) o tornarin une vore prest.