BERSANI A GURIZE

Sabide ai 25 di fevrâr, a lis 11.00

alì dal Teatri Verdi di Gurize

incuintri public cun

PIERLUIGI BERSANI

PARTÎT DEMOCRATIC: ASSEMBLEE REGJONÂL AI 17 E ASSEMBLEE PROVINCIÂL AI 20 DI FEVRÂR

Il president Tarcisio Barbo al à convocât la Assemblee Regjonâl dal Pd par vinars ai 17 di fevrâr. La convocazion e je fissade a lis 18.30 in Vie Joppi 63 a Udin.

Cuatri ponts intal ordin dal dì:

1- Pont politic e programatic cun particolâr riferiment ae conference programatiche e ae ativitât dal Grup consiliâr regjonâl

2- Scjadincis eletorâls aministrativis 2012

3- Viers lis elezions regjonâls

4- Variis e eventuâls

Invezit, la presidente Elena Maiulini e a convocât par lunis ai 20 di fevrâr a lis 19.00, simpri alì de sede dal Pd di Vie Joppi a Udin, la Assemblee Provinciâl dal Partît Democratic. Ca sot l’ordin dal dì:

1- Votazion sul belanç consuntîf 2011 e preventîf 2012

2- Votazion su domande di deroghe a Francesco Martines (ai sens dal art.21, co.8 e 9 dal statût nazionâl) su cuistion di incompatibilitât (ex art. 44, co. 2 dal statût regjonâl)

3- Comunicazions dal segretari provinciâl Lerussi cun rivuart ae situazion provinciâl e regjonâl

4- Dibatit

5- Conclusions dal segretari provinciâl

ALESSANDRA KERSEVAN A "PORTA A PORTA" PAR FEVELÂ DI FOIBIS E LAGER FASSISCJ

Lunis ai 13 di fevrâr e larà in onde su Rai Uno une pontade de trasmission Porta a Porta dedicade a la Zornade dal Ricuart e in particolâr a lis foibis, ai cjamps di concentrament fassiscj e a la storie dal confin orientâl. In studi e sarà presinte la storiche Alessandra Kersevan di Udin. Une pontade di no pierdi.

GNOVIS DE CAMPAGNE "L'ITALIA SONO ANCH'IO"

Si sta inviant viers la conclusion la Campagne Nazionâl pai dirits di citadinance "L'Italia sono anch'io". Ancje  te nestre Regjon il Comitât pal Friûl-Vignesie Julie al à tirât sù lis firmis a sostegn di dôs propuestis di leç di iniziative popolâr: "Normis pe partecipazion politiche e aministrative e pal dirit di eletorât cence discriminazions di citadinance e nazionalitât" e modifichis ae leç N.91/92 "Gnovis normis di citadinance". Joibe stât il responsabil imigrazion de segretarie provinciâl dal Partît Democratic Lorenzo Fabbro al à consegnât ai rapresentants dal Comitât, li de Cgil di Udin, plui di 600 firmis cjapadis sù dilunc di une schirie di iniziativis inmaneadis sul teritori di bande dal Pd. Te stesse ocasion, Fabbro e il segretari provinciâl Andrea Lerussi e an pandût la condivision dal partît cun rivuart ae manifestazion organizade dai sindacâts par protestâ cuintri la gnove tasse par rignuvî il permès di permanence. Lei il comunicât sul sît dal Pd provinciâl.

FIESTE PAI 1250 AGNS DI PALAÇÛL: LETARIS, POLEMICHIS, ASSENCIS E PATAFS

Giuliano Bini, za aministradôr dal comun di Palaçûl ma soredut  preseât ricercjadôr  e studiôs di storie locâl, za di almancul un pâr di agns al stâ pandint la necessitât di memoreâ  e celebrâ in maniere adeguade intal 2012  il complean dal nestri paîs, ven a dî 1250 agns dal prin document scrit li che al salte fûr il non di Palaçûl.  Une ricorence no di pôc par une comunitât. Di fat, ancje i sorestants di cumò, il sindic Bordin e la so zonte, e someavin in cunvigne par organizâ alc di impuartant, une schirie di apontaments storics e culturâls e soredut une fiestone che e metès adun dut il paîs superant lis divisions dai ultins agns. Il prin apontament unitari par  tacâ ben un an tant impuartant al veve di jessi la presentazion di un libri, curât dal stes Giuliano Bini, su la storie politiche e aministrative di Palaçûl intitulât "Il Cumun". Ben, cualchi dì prime de presentazion i aministradôrs di vuê e di îr e  dutis lis associazions dal paîs e an ricevût une letare firmade dal sindic (e di dute la zonte) li che si criticave a fuart il libri parcè che l'autôr al varès "metût ae berline" i mandâts aministratîfs che lu viodevin poiâ la oposizion o la dissidence, in particolâr i ultins agns di guvier Leghe-Pdl e par chest e comunicavin che no varessin partecipât ae presentazion dal libri.  Posizion che sul Messaggero Veneto e je vignude fûr cussì: "Palazzolo, schiaffo leghista alla festa per i 1250 anni". Benon, siôr sindic,  scomencin une vore ben, altri che fieste dal paîs, altri che sens de comunitât. In efiets si podarès ancje discuti de obietivitât di cualchi passaç dal libri di Giuliano ma alore a varessin di vê protestât e no jessisi presentâts cetancj di lôr (e no dome de Leghe e dal Pdl) e invezit la matine de presentazion la sale e jere plene. Evidentementri, fale il sindic Bordin e la sô zonte, a Palaçûl, par fortune, la plui part de int e sa acetâ lis opinions diferentis e ancje lis critichis. Chel che no an inmò imparât a fâ, purtrop, Bordin e i siei amîs che, dopo dîs agns, e ritegnin che  une critiche legjitime e sedi une mancjance di rispiet pes istituzions (in pratiche par lôr). E partant no si presentin e a refudin il confront. Une robe inconcepibile par dai bogns aministradôrs e par dai politics responsabii. Une altre, enesime, brute figure e un segnâl ai citadins che nol jude sigurementri ni la coesion sociâl ni a rinfuartî il sens di comunitât.

UNE TASSE DI SCANCELÂ

CJAMP DI CONCENTRAMENT DI VISC. TASSIN: MEMORIE E VERGOGNE

Nus è rivade cheste letare dal prof. Ferruccio Tassin che e fevele di memorie, vergogne e ipocrisie cun rivuart al cjamp di concentrament di Visc.  La publichin ben vulintîr.

Chi ha ascoltato gli interventi dell’anno scorso per la giornata della memoria (chi scrive, in registrazione), avrà apprezzato le preghiere; pel resto, tenebra su quanto successo in Friuli, a Visco (UD). Morti potrebbero esserci, perché andati a nidi sugli alberi, e caduti. Fascismo razzista, assassino, feroce avversario dell’identità, in quelle “analisi”, passato indenne come salamandra il fuoco. Non si è saputo: morti, deportati, erano venuti dall’ex Jugoslavia nel 1943. Si erano salvate le preghiere: Quest’anno ha parlato uno storico onesto, il prof. Stefano Perini; gran bene. Gronda di ipocrisia la giornata della memoria a Visco: il Comune snobba la presenza fisica nell’unico campo fascista in Italia, vincolato nell’intatto cuore logistico, dalla Soprintendenza. Là non si va; chiamati i pompieri: c’è pericolo. A causa di chi? Perché non chiamare i Carabinieri, a esaminare se le nefandezze non ledano forma e sostanza, del decreto Urbani (prove esistono). Perché non dire che a rendere agibile l’area, ci vorrebbe poco (fortezza di Palma pulita da amministratori capaci!)?  e che, quando risuonarono in sala consiliare parole di negazione, l’attuale giunta (allora presente) nulla obiettò. Perché non dire che il monumento, eretto dalle vittime, è sepolto dalle erbacce, incivile vergogna europea? L’ accennare a generica memoria “fa immagine”, ma servirsene è ipocrita? Perché non adottare, almeno, un silenzio pudico e vergognoso?.

Il coordinatore della Associazione Culturale Vischese “Terre sul Confine”

Prof. Ferruccio Tassin

LIS FEMINIS E IL GUVIER MONTI: NO DOME CULTURE, ASSISTENCE E FAMEE"

Vinars ai 10 di fevrâr, a lis 18.00, alì de sede de Regjon in Vie Sabbadini a Udin, inte Sale Pasolini incuintri public sul teme "Lis feminis e il Guvier Monti: no dome culture, assistence e famee". E parteciparan Rita Ghedini, senatore e componente de Comission permanente "Lavôr e previdence sociâl", Tamara Blasina, senatore e rapresentante pe minorance slovene, Manuela Croatto, responsabile pes relazions esternis de Universitât dal Friûl, Annamaria Menosso, conseire regjonâl e Giulia Romano, puartevôs des Democratichis dal Pd provinciâl di Udin.

COMUNICÂT DAL COMITÂT 482 CUN RIVUART AI FONTS PE LEÇ 482/99: O SIN AE FARSE!

Juste cumò il Dipartiment pai afârs regjonâi de Presidence dal Consei dai Ministris al à dât fûr la circolâr su la assegnazion dai fonts previodûts de leç statâl 482/99 pal 2012 (ancje se formalmentri a son calcolâts pal 2011) e il cuadri che indi ven fûr al è di sgrisulâsi. Cun di fat, i bêçs metûts par dutis lis dodis comunitâts minorizadis ricognossudis dal Stât talian cu la 482 a son juste 1.768.792 euros. Di chescj a rivaran inte Regjon autonome Friûl – Vignesie Julie 362.200 euros: 240.608 pal furlan, 108.605 pal sloven e 12.987 pal todesc.

Il Guvier Monti, tal cidin plui totâl, al à rivât a fâ fintremai piês di chel che al veve fat il Guvier Berlusconi tal 2010 cuant che par garantî i dirits linguistics des dodis minorancis ricognossudis a jerin stâts metûts sì e no 2 milions di euros e al Friûl – Vignesie Julie i jerin rivâts uns 465 mil euros. No sin nancje a di un sest des risorsis dadis fûr pôcs agns indaûr…

Prime o vin vût di spietâ passe cincuante agns par che si des forme a un dai principis di fonde de Costituzion republicane (art. 6) par mieç de leç statâl 482. Po, passâts plui di dîs agns che chê leç e je stade fate buine, o sin inmò che o spietìn che e tancj dai siei contignûts a sedin metûts in vore. Cumò lis risorsis plui che scjarsis metudis dai diviers guviers talians par meti in vore la 482 a deventin juste fruçons. Si disarà che, in timps di crisi, ducj a àn di meti dal lôr. Nô invezit si domandìn parcè che a paiâ a àn di jessi simpri chei. Il Guvier, di fat, al spint di plui par fâ svolâ par dîs oris un cjacebombardîr Tornado che no par garantî, par un an a dilunc, i dirits linguistics di furlans, slovens e todescs dal Friûl – Vignesie Julie: o sin pardabon rivâts ae farse!

Al è pussibil che cualchidun, un tic dûr di çucje, al contindi che a son lis autoritâts europeanis a domandânus chescj sacrificis. Alore ur ricuardìn che te “Tierce Opinion su la Italie” dade fûr l’an passât dal Consei de Europe su la metude in vore de Convenzion cuadri pe protezion des minorancis nazionâls si diseve a clâr che za ta chê volte i tais fats a riscjavin di vê “consecuencis une vore seriis pes minorancis” e che a jerin plui che justificadis lis pôris di cui che, a tacâ dai furlans, si viodeve intai fats impedît di “promovi pardabon i dirits dai membris di chestis comunitâts”.

Se e je vere che aromai la uniche reson par difindi la specialitât dal Friûl – Vignesie Julie e je la presince maioritarie di comunitâts che a fevelin une lenghe proprie divierse di chê dal Stât, ancje su la fonde di cheste ultime maçade che nus àn dât, al devente sante scugne che i rapresentants de nestre Regjon a tratin cun Rome il trasferiment totâl des competencis e des risorsis par cierts setôrs a tacâ propit de difese e de promozion des lenghis minorizadis e de organizazion scolastiche (il câs di Migjee – passaitnus il zûc di peraulis – al fâs scuele!). Cuale ocasion miôr par fâlu de taule di lavôr Stât – Regjon che e varès di nassi dopo dal incuintri a pene stât tra il president dal Guvier talian Mario Monti e chel regjonâl Renzo Tondo? Al è in zûc l’interès coletîf des nestris comunitâts. Par chest o sperìn che Zonte e Consei regjonâl dal Friûl – Vignesie Julie, adun cui parlamentârs elets inte nestre regjon, a lassin di bande i prejudizis ideologjics e a tachin a batisi pai nestris dirits denant dal guvier talian.

Udin, 04/02/2012

Il puartevôs dal Comitât – Odbor – Komitaat – Comitato 482

Carli Pup

CUNVIGNE DI LEGAMBIENTE: “INCUINAMENT E MALATIIS: CE CHE O VIN DI SAVÊ E CE CHE O VIN DI F”

Il Circul Legambiente di Udin, cul contribût di FVG Solidale, e in colaborazion cul Centri Balducci di Çuian, Città Sana, Isde FVG, Associazion Alpi, Club Unesco di Udin e cul patrocini dai Comuns di Udin, Cjampfuarmit, Martignà Mortean, Pavie di Udin, Poçui, Pradaman, Remanzâs e Tavagnà us invide a partecipâ al incuintri public “Incuinament e malatiis: ce che o vin di savê e ce che o vin di fâ” che si davuelzarà vinars ai 10 di fevrâr 2012, a lis 20.30, alì dal Centri Balducci di Çuian.

Ca sot il program de serade.

Presentazion: Marino Visentini, President Circul Legambiente di Udin.

Intervents: Dot. Diego Serraino, diretôr SOC epidemiologjie e biostatiche dal Centri di riferiment oncologjic di Davian “Inzornament sui tumôrs in Friûl Vignesie Julie. Cognossi par prevignî” e Dot. Mario Canciani, responsabil dal servizi di pneumologjie inte Cliniche pediatriche de Aziende Ospedaliere Universitarie di Udin.

Dibatit.

Par informazions: udine@legambientefvg.it

COORDENAMENT DAL PD DE BASSE A PALME

Il coordenadôr Fulvio Tomasin al à convocât le Assemblee dal Coordenament dal Pd de Basse Furlane par joibe ai 9 di fevrâr, a lis 20.30, alì dal Auditorium San Marc (sale dal Ristorant La Filanda) a Palme.

La discussion e sarà centrade su la situazion politiche locâl e regjonâl cun rivuart particolâr a lis scjadincis eletorâls dal 2013. E a sigurât la sô presince la segretarie regjonâl Debora Serracchiani.

IMPUGNADE (UNE ALTRE VOLTE) LA LEÇ REGJONÂL SUL WELFARE. IL GUVIER: INCOSTITUZIONÂL

Ai 27 di zenâr il guvier Monti al à impugnât (une altre volte) la leç sul welfare de Regjon Friûl Vignesie Julie. La maiorance Pdl-Leghe-Udc e veve modificade la leç daspò de prime impugnazion par incostituzionalitât di bande dal guvier Berlusconi e dopo che e jere rivade notizie di une procedure di infrazion di bande de Union Europeane. Cun di plui plui di cualchi comun de regjon al jere stât condanât par vê aplicât lis normis dal "welfare padan". Evidentementri il centri drete regjonâl a nol à imparade la lezion e la gnove boçadure e riscje di provocâ il caos o salacor fintremai un bloc inte erogazion dai contribûts. Il segretari de Cgil Franco Belci al à comentât: "daspò dal guvier Berlusconi ancje il guvier Monti al à contestât il radicalisim ideologjic de zonte intal perseguî ostinadementri une politiche di discriminazion dai migrants, e, plui in gjenerâl dai no residents. Nol è dubi che la responsabilitât plui grande e sedi di cirî tes politichis xenofobis de Leghe. Ma un gradin plui sot si metin Tondo, che tant che president de Regjon al varès di interpretâ la sensibilitât di dute la comunitât regjonâl e savê cjalâ ancje ae nestre storie e Molinaro, in chest câs masse propens a sacrificâ i valôrs dal sô partît a lis resons de stabilitât de maiorance". Lei ca la notizie sul sît dal Centri Balducci e de Rêt Dirits Fvg e il coment de Asgi e dal conseîr regjonâl dal Partît Democratic Franco Codega.