A TISANE CUL CANDIDÂT DI CENTRI ÇAMPE PAR DISCUTI DES PROPUESTIS PAL CUMIERÇ E IL TERZIARI

Lunis ai 18 di avrîl la liste di centri çampe e il candidât sindic Fantin e proponin a Tisane un interessant moment di riflession e di propueste sul teme dal cumierç un compart storichementri impuartant par Tisane e cumò imberdeât intune crisi profonde. Robis une vore concretis duncje .... intant Pdl e Udc e puartin a Tisane, stesse ore, il Ministri Frattini che al podarà contâ dai sucès dal guvier in teme di politiche tal forest, soredut in nord Afriche, o magari dai beneficis pe economie che e rivaran dal "processo breve" .....

E CONTINUIN LIS INIZIATIVIS ELETORÂLS DAL CENTRI ÇAMPE A TISANE

Doi apontaments inmaneâts te suaze de campagne eletorâl dal centri çampe a Tisane: lunis ai 11 di avrîl, aes 20.30 li de sale riunions dal Hotel Bella Venezia le liste "Centro Sinistra per Latisana" e invide ducj a partecipâ al incuintri public sul teme "Federalisim e fiscalitât municipâl". E fevelaran Guido Monis, Sergio Simonin, il candidât sindic Orlando Fantin e il senatôr dal Partît Democratic Carlo Pegorer. Sabide ai 9 di avrîl presentazion dal candidât sindic Orlando Fantin e de sô liste te frazion di Perteade: apontament li dal Centri Social aes 18.30. La ocasion juste par cognossi, scoltâ, domandâ e confrontâsi.

SUCÈS A TISANE PE INIZIATIVE DAL PD CUN FANTIN E SERRACCHIANI SUL TEME DAL LAVÔR

I circui de Basse Ocidentâl dal Partît Democratic e an fat il plen al Polifunzionâl di Tisane li che plui di 130 personis e an partecipât al incuintri public sul teme da lavôr e dal disvilup locâl. Dopo le introduzion dal segretari dal Pd di Tisane Luca Abriola, Carlos Corvino e Riccardo Cicuttin e an presentât dôs relazions une vore interessantis: la prime une analisi statistiche e no dome sul marcjât dal lavôr a plui livei, nazionâl, regjonâl e locâl e la seconde cuntune schirie di solecitazions sul rûl propositîf che e podaressin vê i ents locâi e in particolâr i comuns rivuart il guvier dal teritori e la creazion di oportunitâts. I stimui e son stâts tirâts su ae grande sedi dal candidât sindic pal centri çampe Orlando Fantin - che al a ilustrât ai presints ideis e propuestis programatichis pal disvilup di Tisane e dal teritori - sedi de segretarie regjonâl dal Pd Debora Serracchiani che, cuntun intervent une vore preseât, e a spaziât dal livel european aes problematichis talianis e de nestre Regjon. Orlando Fantin al à pontât il dêt ancje su lis divisions dal centri drete a Tisane, marcant il fat che intant che il centri çampe al continue a presentâ lis sôs propuestis su plan regoladôr, coesion sociâl, politichis pal lavôr e v.i. di che altre bande al è un cidinôr impressionant: ancje par chest e je bielzà partide la domande di organizâ un confront public tra i candidâts par un confront trasparent e tal merit des ideis e dai programs.
Ae fin ancje diviers intervents e contribûts di bande dal public e dibatit interessant e vivarôs.

la foto e je cjolte sul sît http://www.latisana.it

TISANE 2011: IL CANDIDÂT DAL CENTRI ÇAMPE

A Tisane, dopo lis candidaturis che e an crevât il centri drete, une espression de atuâl aministrazion Pdl e Leghe cu la zonte de Udc e candidât sindic l’assessôr Salvatore Benigno e la seconde espression dai dissidents dal Pdl, di Fli, de liste Il Paese e cualchi grup civic ancje di int dongje de Leghe Nord cun candidât l’assessôr dimissionari Ezio Simonin, ancje le alternative progressiste e presente il sô candidât sindic: Orlando Fantin (te foto il prin a drete) za assessôr e vice sindic socialist dal comun di Tisane dal 1978 al 1988, miedi e dirigjent dal repart di medisine di urgjence intal Ospedâl di Tisane fin a cualchi mês indaûr e cumò dirigjent dal Pd di Tisane. La presentazion de candidature si davuelzarà sabide 5 di març, aes 18.30, te Sale dai Stucs di Palaç Molin Vianello a Tisane.

1980-2010 LA "RETROSPETIVE" DI ORLANDO FANTIN

Cualchidun dal sigûr sal vise tant che brâf assessôr e vice sindic socialist dal comun di Tisane dal 1978 al 1988, o tant che valent miedi e dirigjent dal repart di medisine di urgjence intal Ospedâl di Tisane fin a cualchi mês indaûr. Che no l’è tant lu vin preseât di gnûf tant che esponent politic dal Partît Democratic di Tisane e in particolâr tant che relatôr intal incuintri public inmaneât dal Pd sul teme de riorganizazion de assistence aes fassis debilis e dai servizis sociâi.

Orlando Fantin al à dal sigûr une personalitât poliedriche e talentuose e al è pardabon un personaç impuartant tal panorame latisanês e de basse ocidentâl.

No savin trops che e cognossin Orlando Fantin ancje come artist e alore us informin cun plasê che sabide ai 29 di zenâr 2011, aes 18.00, inte suaze de Galarie “La Cantina” in Vie Radaelli a Tisane a si scree la sô mostre retrospetive di piture 1980-2010.

La mostre è restarà vierte fin ai 19 di fevrâr 2011.

LASSITS E SERVIZIS PAL SOCIÂL: LIS PROPUESTIS DAL PD PAR TISANE

Un sucès la iniziative inmaneade dal circul dal Partît Democratic di Tisane lunis stât lì dal Centri Polifunzionâl di Vie Goldoni. Buine partecipazion di bande dai citadins, a jerin presintis plui di cincuante personis, e soredut intervents e propuestis claris di bande dai relatôrs che e son stadis une vore preseadis di bande de int. Frache chi par lei il rindicont de serade sul sît dal Pd di Tisane e su le fotografie parsore par lei il struc dal intervent di Orlando Fantin.