LA REGJON E SIERE IL PONT NASSITE INTAL OSPEDÂL DI TISANE

La Regjon e a decidût di sierâ il pont nassite e probabilmentri la vuardie pediatriche intal Ospedâl di Tisane. Une decision une vore pesante pal nestri teritori. Si podevial fâ alc par impedî l'enesime pierdite di servizis essenziâi e strategjics te Basse Ocidentâl? Intun intervent publicât sul MV il cjâf grup de liste "Centrosinistra per Latisana" Orlando Fantin al met in evidence lis responsabilitâts de aministrazion comunâl di Tisane e in particolâr di Micaela Sette e dal sindic atuâl Salvatore Benigno.

UNE LEÇ DI BON SENS E DI CIVILTÂT

Presentade di bande dal centri çampe in consei regjonâl (prime firmatarie la conseire dal Partît Democratic Annamaria Menosso) une propueste di leç par agjevolâ e facilitâ il reperiment e l'acuist di midisinis a base di cannabis cun finalitâts terapeutichis.

La esigjence di chestis normis e je stade segnalade di cetantis personis maladis (par esempli di sclerosi) che e an dificoltâts a convivi cul dolôr e, sot control dal miedi, e an necessitât di assumi midisinis a base di cannabis.

Chescj prodots, che a dan mancul assuefazion e a son mancul devastants des curis a base di  morfine, in Italie,  a cause de atuâl legjislazion, a son proibîts e no si ju cjate in cumierç.

Ancje lis pocjis struturis autorizadis e an di comprâju intal forest con proceduris dificilis e onerosis e dispès a no son in stât di corispuindi ae domande. Une leç di bon sens e di civiltât.  Sperìn che e vegni fate buine il prin pussibil.

CONVOCÂT IL COORDENAMENT PD DE BASSE PAR DISCUTI DI RIFORMIS E SANITÂT

Il coordenadôr dal Partît Democratic de Basse Fulvio Tomasin al à convocât il coordenament de Basse slargjât ai segretaris e ai circui par discuti di sanitât e in particolâr de Riforme dal Sisteme Sanitari Regjonâl. Ae riunion, che si davuelzarà joibe ai 15 di març, a lis 20.30, inte sale dal Ristorant La Filanda (Auditorium S. Marc), a parteciparan Ezio Beltrame, za Assessôr Regjonâl ae Sanitât e coordenadôr dal Forum Sanitât dal Pd e une rapresentance di rapresentants sindacâi de sanitât funzion publiche.

"VIERS LA CONFERENCE PROGRAMATICHE. IL MONT AL CAMBIE, LA REGJON E JE FERME. SANITÂT FVJ: GARANTÎ E RILANÇÂ IL SISTEME PUBLIC AL SERVIZI DAI CITADINS"

Il Partît Democratic dal Friûl Vignesie Julie us invide a partecipâ, sabide ai 30 di avrîl 2011, aes 09.30, li de Vile Manin di Codroip, ae cunvigne intitulade: "Viers la conference programatiche. Il mont al cambie, la Regjon e je ferme. Sanitât FVJ: garantî e rilançâ il sisteme public al servizi dai citadins"
Introduzion:
ENZO MARTINES Responsabil Conference Programatiche
ROSI BINDI Presidente Nazionâl dal Partît Democratic
Relazion di:
EZIO BELTRAME Responsabil regjonâl sanitât PD-FVJ
Intervents di:
GUSTAVO MAZZI Associazion Taliane Miedis pal Ambient
MARIO SCHIAVON President IPASVI Provincie di Gurize
SERGIO LUPIERI Conseîr Regjonâl PD FVJ
CARLA COMISSO Candidade Sindic dal Comun di Codroip
Conclusions:
DEBORA SERRACCHIANI Segretarie Regjonâl PD FVJ
Dibatit

IL PD REGJONÂL DAL FVG AL CJAPE POSIZION CUINTRI IL NUCLEÂR E LA PRIVATIZAZION DE AGHE

Te ultime direzion regjonâl dal Partît Democratic che si è davuelte lunis ai 21 di març al è stât fat bon il document elaborât di bande de comission vuidade di Ezio Beltrame e presentât tant che contribût programatic pe riforme de sanitât regjonâl e chel cun rivuart aes infrastruturis elaborât di bande dal forum dal conseîr regjonâl Brandolin. Daspò de relazion de segretarie regjonâl Debora Serracchiani discussion e aprovazion ancje par doi ordins dal dì che e impegnin il partît regjonâl a supuartâ lis resons dai referendum in favôr de aghe publiche e cuintri il nucleâr.
Votade ancje la gnove segretarie regjonâl compueste di Rino Battocletti, Vittorino Boem, Silvia Caruso, Paolo Coppola, Luigi Cortolezzis, Miriam Davide, Carmen Galdi, Fabio Gri, Antonella Grim, Renzo Liva, Diego Moretti, Cristina Nazzi, Fabio Omero, Giorgia Polli, Renzo Travanut (coordenadôr politic), Stefano Ukmar e Fabrizio Venier.

PD DI TISANE: GNÛF SEGRETARI, GNOVIS INIZIATIVIS

Ancje il circul dal Partît Democratic di Tisane al à rinovât il diretîf. Il gnûf segretari al è Luca Abriola. A lui i miôr auguris di bon lavôr e l’impegn a colaborâ puartânt indevant iniziativis “teritoriâls” intal latisanês. E torne la “vite” ancje intal sît dal Pd di Tisane che nus vise che lunis ai 20 di dicembar, a lis 21.00, alì dal Centri Polifunzionâl di Vie Goldoni a Tisane a si davuelzarà un incuintri public sul teme de riorganizazion de assistence aes fassis debilis e dai servizis sociâi. Dongje dal gnûf segretari e puartaran il lôr contribût Orlando Fantin e Sergio Simonin. Ducj e son invidâts a partecipâ.

LA RIFORME DI KOSIC E SIARE IL PONT NASSITE DAL OSPEDÂL DI TISANE: BARUFE INTAL PDL

Îr l’assessôr regjonâl ae sanitât Kosic sul Messaggero al presentave la sô “riforme” de sanitât regjonâl e al pandeve la volontât di sierâ il pont nassite dal Ospedâl di Tisane.

http://ricerca.gelocal.it/messaggeroveneto/archivio/messaggeroveneto/2010/10/24/PP_01_PRIUD22.html

Vuê ancje il Pdl, simpri sul Messaggero, al critiche a fuart l’assessôr, anzit, il partît di Kosic al fevele di “fuga in avanti, di posizioni personali, di argomentazioni inconsistenti” domandant l’intervent di Tondo e il ritîr de delibare.
Lait a lei achì lis interessantis declarazions di Tondo e compagnie cun rivuart a l’Ospedâl di Tisane: http://www.latisana.it/index.php/component/content/article/170-politici-ospedale-e-verita-che-cambiano
Compliments. Chel che si dîs “ideis claris” e “promessis mantignudis”. Nuie ce dî: un partît di guvier!