I Circui dal Partît Democratic di Trivignan e Cjopris Viscon us invidin a partecipâ al incuintri public "La riforme des pensions: lis pensions di vuê e chês di doman...." che si davuelzarà joibe ai 31 di març lì da lis ex scuelis di Clauian.
Te ultime direzion regjonâl dal Partît Democratic che si è davuelte lunis ai 21 di març al è stât fat bon il document elaborât di bande de comission vuidade di Ezio Beltrame e presentât tant che contribût programatic pe riforme de sanitât regjonâl e chel cun rivuart aes infrastruturis elaborât di bande dal forum dal conseîr regjonâl Brandolin. Daspò de relazion de segretarie regjonâl Debora Serracchiani discussion e aprovazion ancje par doi ordins dal dì che e impegnin il partît regjonâl a supuartâ lis resons dai referendum in favôr de aghe publiche e cuintri il nucleâr.
I circui de Basse Ocidentâl dal Partît Democratic e an fat il plen al Polifunzionâl di Tisane li che plui di 130 personis e an partecipât al incuintri public sul teme da lavôr e dal disvilup locâl. Dopo le introduzion dal segretari dal Pd di Tisane Luca Abriola, Carlos Corvino e Riccardo Cicuttin e an presentât dôs relazions une vore interessantis: la prime une analisi statistiche e no dome sul marcjât dal lavôr a plui livei, nazionâl, regjonâl e locâl e la seconde cuntune schirie di solecitazions sul rûl propositîf che e podaressin vê i ents locâi e in particolâr i comuns rivuart il guvier dal teritori e la creazion di oportunitâts. I stimui e son stâts tirâts su ae grande sedi dal candidât sindic pal centri çampe Orlando Fantin - che al a ilustrât ai presints ideis e propuestis programatichis pal disvilup di Tisane e dal teritori - sedi de segretarie regjonâl dal Pd Debora Serracchiani che, cuntun intervent une vore preseât, e a spaziât dal livel european aes problematichis talianis e de nestre Regjon. Orlando Fantin al à pontât il dêt ancje su lis divisions dal centri drete a Tisane, marcant il fat che intant che il centri çampe al continue a presentâ lis sôs propuestis su plan regoladôr, coesion sociâl, politichis pal lavôr e v.i. di che altre bande al è un cidinôr impressionant: ancje par chest e je bielzà partide la domande di organizâ un confront public tra i candidâts par un confront trasparent e tal merit des ideis e dai programs.
Miercus ai 30 di març 2011, aes 14.15 - Palaç Torriani, Udin
In ocasion dal 3 di Avrîl, aniversari de nassite dal Stât Patriarcjâl furlan, e je stade metude adun dai comuns di Cjarlins, Muçane e Sant Zorç, la Fieste dal Friûl te basse Furlane. 
guerrino cecotti
i luna e un quarto
le sale plene dal auditorium S. Vitale“La primevere dal 1950, la miserie e la emigrazion, il plan pal lavôr e il grant siopar contrari sul Cormôr. Comizis cun miârs di personis a jemplâ lis placis, sindacaliscj ex-partigjans a traviersâ lis stradis de Basse in biciclete, i zovins, lis assembleis dai zornadîrs. Une lote deventade event politic e sociâl di enorme impuartance pal teritori de Basse e pal mont dal lavôr furlan in gjenerâl. Tornâ a contâ par no dismenteâ.”
Il prin apontament de rassegne Anpi “Resistenze 2011”, dedicât aes Lotis dal Cormôr dal 1950, al è stât un sucès al di là des sperancis. Cirche 150 personis e an jemplât l’auditorium S. Vitale di Muçane mostrânt che la memorie dai oms e des feminis dal Cormôr e je inmò vive. Dopo la introduzion di Lorenzo Fabbro, Adriano Venturini al à presentât un straordenari e comovent video-documentari realizât di Radio Onde Furlane montant lis intervistis ai protagoniscj tiradis sù dilunc dal an passât (60° inovâl des Lotis). Bielissimis ancje lis musichis dai Luna e un Quarto (simpri plui brâfs) e lis leturis dal poete Maurizio Mattiuzza che e an compagnât i presints intun viaç penç di storiis e sintiments. Lis peraulis di Giancarlo Velliscig e la vôs sflandorose di Alessandra Kersevan e an scjaldât i presints che però il batimans plui lunc a lu an regalât a Guerrino Cecotti, l’ultin dirigjent des Lotis dal Cormôr che, rivât dongje dai otante, nol à pierdût dal sigûr ni il snait ni la grinte di chei agns. Cristian Sedran, assessôr dal comun di Muçane che al à sigurât il patrocini de iniziative, al à consegnât un presint tant che segn di ricognossince a Bertuzzi Achille, Brotto Bruno, Cecotti Guerrino, Cudini Rino, Galasso Fanny, Tollon Felice, Andrian Gastone, Mian Mario, Bragagnolo Angela, Alfredo Zaina, Del Piccolo Sante e a Anna Graziutti, fie dal mitic Franco Graziutti “Pablo”. Ultin ricognossiment ae memorie di Ernesto Tartaro, che nus a lassâts sabide stât, e par finî la conclusion cuntune fantastiche e liberatorie “Bella Ciao” cjantade di dute la sale e che e someave no volê finî plui……
Vinars ai 25 març, aes 20.30, alì de CGIL in vie Bassi 36, Udin
Dopo lis iniziativis (1 - 2) dal Partît Democratic rivuart ai inadempiments de aministrazion regjonâl di centri drete in riferiment aes politichis linguistichis pal furlan e ae mancjade aplicazion de Leç Regjonâl 29/2007 lis critichis e son stadis ribatudis, dilunc di une conference stampe inmaneade martars stât intal palaç de regjon a Udin, ancje di doi sogjets impuartants tant che il Comitât pe Autonomie e il rilanç dal Friûl e il Comitât 482. Par restâ in argoment lait a lei ca un intervent di Lorenzo Fabbro, component de segreterie provinciâl dal Pd, che al interven in particolâr sul cantin de presince de lenghe sui media e sul contrat di servizi rai e ca la notizie di une interpelance presentade dal conseîr regjonâl dal Pd Mauro Travanut in riferiment ae propueste, une vore preocupante, di stravuelzi la impostazion de Arlef midiant modifichis al statût che e proviodin di trasferî il podê di indreçament des politichis linguistichis dal Comitât Tecnic Sientific (organisim formât di esperts) al Consei di Aministrazion (organisim di nomine politiche direte) cul risi di incressi inmò di plui il podê discrezionâl dai politics inte programazion e intal finanziament dai progjets pal furlan.
I circui dal Partît Democratic de Basse Ocidentâl us invidin a partecipâ al incuintri public sul teme "Lavôr e ocupazion: cuâl rûl pes aministrazions locâls" che si davuelzarà martars ai 22 di març 2011, aes 20.30, te sale otagonâl dal Centri Polifunzionâl di Vie Goldoni a Tisane. Dopo de esposizion e de analisi dai dâts statistics cun rivuart al marcjât dal lavôr regjonâl e locâl Debora Serracchiani, europarlamentâr e segretarie regjonâl dal Pd e Orlando Fantin, candidât sindic pe coalizion di centri çampe aes elezions comunâls a Tisane e proponaran struments e strategjiis par agjevolâ il disvilup socio economic dal teritori.
Prime jessude publiche de candidade a sindic di Palaçûl Manuela Romano che e varà il sostegn di dôs listis civichis. Intant intal cjamp dal centri drete Leghe e Pdl fin cumò no an rivât a cjatâ un acuardi e la conferme de candidature dal leghist Mauro Bordin inmò no rive.
LA MEMORIE, DOPO LA LIBERAZION LIS LOTIS PAL LAVÔR: 
Sabide ai 19 di març il grup di Laboratori Muzane al sarà in place Sbaiz a Muçane, des 9 aes 12,30, cuntun bancut dulà che si cjatarà materiâl informatîf e al sarà pussibil poiâ la campagne referendarie pe aghe publiche cuntune piçule donazion.
Il president Tarcisio Barbo al a convocât par lunis ai 21 di març, a lis 20.30, alì de sede dal Partît Democratic in Vie Joppi 63 a Udin la Assemblee Regjonâl dal PD dal Friûl-Vignesie Julie.
anpi sezione intercomunale di palazzolo-muzzana-pocenia-precenicco con la collaborazione di circolo culturale artetica, radio onde furlane, associazione trois, auser turgnano, auser stella&tagliamento, spi cgil lega di san giorgio e latisana e con il patrocinio dei comuni di palazzolo dello stella e muzzana del turgnano ed il sostegno di coop distretto di latisana e coop. cam85
I circui dal Partît Democratic di Dael, Cjamplunc Tapoian, Rude e Visc us invidin a partecipâ al incuintri public “Cualis scuelis pai piçui comuns - la situazion des nestris scuelis dopo la riforme Gelmini” che si davuelzarà vinars ai 11 di març, aes 20.00, alì dal Municipi di Cjamplunc Tapoian. E fevelaran: Fulvio Tomasin, aministradôr public, Franca Gallo, segretarie provinciâl Flc Cgil Scuele e i dirigjents scolastics Vincenzo Pappalardo, Aldo Durì e Laurino Nardin. Lis conclusions e saran di Franco Codega, conseîr regjonâl dal Partît Democratic.
Viers la fin dal 2009 la maiorance PDL – Leghe Nord e votave in Parlament la conversion di un decret leç che al obleave di fat a privatizâ i servizis pe aghe in Italie. Il Pd al à votât cuintri e ca o cjatais la posizion dal partît dal Friûl Vignesie Julie. Intai circui e intai conseis comunâi o vin metût in pîs iniziativis e tirât su firmis par domandâ di votâ une schirie di referendum abrogatîfs. Le straordenarie mobilitazion e a puartât a firmâ un milion e mieç di personis e, dopo le decision de Consulte, intal prossim mês di jugn o larìn a votâ par doi referendum a difese de aghe ben comun. Il Pd nazionâl al presentarà une propueste di leç alternative ae privatizazion sfuarçade dal centri drete. Intant però ai vûl sostignût i referendum ancje parcè che il guvier al à dineât la pussibilitât di acuarpament cu lis aministrativis cul clâr intent di fâ mancjâ il quorum. Un grup di iscrits e eletôrs dal Pd al à scrit une letare vierte al segretari Bersani: “Cjâr Segretari, o sin un grup di militants e eletôrs dal Partît Democratic che e an poiât la campagne di racuelte firmis in favôr dai referendum pe aghe publiche. Daspò de decision cjapade di bande de Consulte si cjatin devant di doi referendum pe difese de aghe comun.Ti domandin di esprimi une posizion clare e cence inciertecis su cheste cuistion. Al covente pandi in maniere clare che il Partît Democratic al prudelarà in maniere convinte i Sì ai 2 referendum abrogatîfs in difese de aghe tant che ben comun e che a si impegnarà in cheste bataie cun dut il sô pês politic e organizatîf. Cheste e je une cuistion politiche essenziâl che e domande assolude clarece. O sin sigûrs che ancje tu tu capirâs la impuartance e la necessitât di une rispueste ancjetant clare e ti mandin un salût di afiet”. Ancje noaltris la pensin cussì.
Un biel soreli al à scjaldât cualchi centenâr di personis che îr di matine si son dadis dongje a Sacilet di Rude par memoreâ i partigjans de Intendence Montes e de Gap-Friûl massacrâts dai fassiscj republichins de Caserme Piave di Palme. Ancje chest an memorie, valôrs e grande partecipazion di popul pe manifestazion de Anpi plui impuartante de Basse furlane. Te foto di Mauro Grion il sindic di Rude Palmina Mian e lei il sô intervent.
Intal Cie di Gradiscje la situazion e je totalmentri fûr di control. Une emergjence nazionâl. E ancje une vergogne nazionâl. Soreafolament, int che e mangje e duar par tiere, violazions sistematichis dai dirits plui elementârs, rivoltis e fûcs. Ancje il Siulp al torne a domandâ di sierâ la struture e intant la Prefeture e continue a dineâ cualsisedi visite di bande dai orghins di informazion e dai politics e conseîrs regjonâi che e an denunciât la situazion e domandât di visitâ le struture. Le prossime setemane e rivaran i rapresentants de comission parlamentâr di vigjilance in materie di imigrazion. 
Daspò de notizie de proroghe de casse integrazion par altris doi agns ai operaris de Safilo al rive ancje il vie libare de assemblee dai lavoradôrs al plan di rilanç de aziende za fat bon in sede ministeriâl e presentât dai sindacâts. Si proviôt che è tornarà a partî in curt la lavorazion dai ocjâi intal stabiliment di Martignà impleânt 300 personis (100 e rivaran di Prissinins).
A Tisane, dopo lis candidaturis che e an crevât il centri drete, une espression de atuâl aministrazion Pdl e Leghe cu la zonte de Udc e candidât sindic l’assessôr Salvatore Benigno e la seconde espression dai dissidents dal Pdl, di Fli, de liste Il Paese e cualchi grup civic ancje di int dongje de Leghe Nord cun candidât l’assessôr dimissionari Ezio Simonin, ancje le alternative progressiste e presente il sô candidât sindic: Orlando Fantin (te foto il prin a drete) za assessôr e vice sindic socialist dal comun di Tisane dal 1978 al 1988, miedi e dirigjent dal repart di medisine di urgjence intal Ospedâl di Tisane fin a cualchi mês indaûr e cumò dirigjent dal Pd di Tisane. La presentazion de candidature si davuelzarà sabide 5 di març, aes 18.30, te Sale dai Stucs di Palaç Molin Vianello a Tisane.
“Udin, biele le vite”. Biele iniziative dal cuotidian sportîf plui let in Italie, la Gazzetta dello Sport, che te edizion di vuê e dediche une pagjine ae scuadre dal Udin e ae capitâl dal Friûl. Il toc plui biel al è dal brâf Marco Pastonesi che, jenfri di tantis robis (sport, culture, cusine, cualitât de vite, musiche, manifestazions tant che Far East, Vicino Lontano e v.i.) al fevele ancje, intune maniere finalmentri corete e positive, di lenghe furlane (lingua, non dialetto!) e di Radio Onde Furlane, la Radio Libare dai Furlans e dai siei programs sportîfs “cult” tant che Schiribicilu e Il balon al è di ducj cun super citazion par Enrico Turloni. Grazie Marco, un articul fantastic (ancje parcè che al è stât scrit in vie Volturno 29). Vive Udin, vive la Rosea, vive Onde Furlane!
Cualchi zornade indaûr e vevin fevelât di une des tantis iniziativis inmaneadis dal Partît Democratic e dal centri çampe par informâ e oponisi ae propueste di leç su lis gjavis elaborade di bande de maiorance regjonâl dal president Tondo che intindarès trasformâ il Friûl inte gjave dal nord est. Te sentade dal consei regjonâl di martars la Leghe Nord (al somee ancje par cuistions di poltronis ma no dome) e vote un emendament de oposizion par ripuartâ lis competencis decisionâls ai comuns cun rivuart aes concessions par autorizâ gnovis gjavis. Un element di sussidiarietât, control elementâr e, ae fin, di democrazie che al ven considerât dal cjâf grup dal Pdl Galasso un "stravuelziment" dal provediment e une "imboscade" di bande dai aleâts di guvier. La leç e je stade ritirade par evitâ une crisi di maiorance cun efiets inmò plui evidents. Une vitorie dal Pd e des oposizions. 
Il Circul dal Partît Democratic di Çarvignan us invide a partecipâ al incuintri public sul teme “Testament biologjic, diretivis anticipadis di tratament” che si davuelzarà vinars ai 4 di març, aes 20.00, li dal Centri Civic di Vie Triest 35 a Çarvignan.
