Un pôc di timp indaûr o vevin fevelât de aziende Volpares par dâ at ae Regjon che alc di positîf al tacave a viodisi ator de impuartante aziende regjonâl salvade de cartolarizazion intal 2003 in grazie dal ativisim e des batais dal centri çampe in consei comunâl e di un comitât di citadins di Palaçûl. Un progjet une vore interessant ancje chel de Fatorie Sociâl partît intal mês di fevrâr 2011. Magari cussì no il president Tondo (simpri lui, che al veve za decidût di vendi Volpares dîs agns indaûr dopo che, simpri sot de sô gjestion e in maniere une vore scorete, la regjon e veve ometût di informâ il comun de pussibilitât di otignî la propietât) al torne a pandi la volontât di disfâsi de aziende par finanziâ l'Ospedâl di Pordenon. A Palaçûl naturalmentri la notizie o vevin di leile sul gjornâl ..... Dome cualchi dì dopo o vin vude le conferme des intenzions di alienazion cuant che Tondo al à rispuindût in consei regjonâl a une interpelance dal conseîr dal Pd Travanut.
Di bande nestre o tornin a marcâ che la Volpares e rapresente un ben public strategjic e impuartant pal nestri teritori, che e van sostignudis lis ativitâts inviadis di resint e che, no dome la aziende no si a di vendile, ma bisugne tornâ a proponi chel grant progjet di disvilup e valorizazion za elaborât a so timp e che al tirave drenti lis risorsis dal teritori e al tignive dongje agriculture, ambient e turisim.
Il Partît Democratic al darà bataie, adun cui citadins e chei altris sogjets economics e sociâi che e an a cûr il nestri teritori, par impedî, inmò une volte, la svendite di un patrimoni public strategjic che, in mancjance di cualsisedi condivision e cun le arogance za mostrade dîs agns indaûr Tondo al varès voie di fanus pierdi par simpri.
1 commento:
Miôr che chest a si sepi in zîr e alore, ancje tal gno blog, o ai scrit JU' LIS MANS DI VOLPARES!
Posta un commento