“Terna e a anunziât cuntun at di pure prepotence di jessi contrarie a cualsisedi concet di riduzion di impat ambientâl, umiliânt i comuns interessâts e sdrumânt la autorevolece de zonte regjonâl”. Chestis lis declarazions de segretarie regjonâl dal Pd Debora Serracchiani daspò de conferme, di bande de societât Terna, che l’eletrodot di 380 kV di fâ sù jenfri Udin e Redipulie al varà di jessi sui pai e no sot tiere.“Il president Tondo al veve sigurât che la posizion de zonte e jere pe soluzion sot tiere – e ricuarde Serracchiani – e che al rivuart al varès sburtât la societât a discuti progjets altenatîfs. Se cheste e je la rispueste, inmò une volte si palese la inconsistence de zonte tant che interlocutôr istituzionâl”. In plui la segretarie dal Pd e domande ai dirigjents de Lee Nord “se cheste e je la gnove maniere di jessi parons a cjase nestre o se invezit, denant di cierts interès, i padans a si dismentein cemût tirâ sù il cjâf e alçâ la vôs”.
“Cun chescj precedents – e zonte Serracchiani - al è aromai sigûr che il Friûl al deventarà sît nucleâr, massime dopo lis declarazions dal president Ballaman che propit intal aniversari dal taramot al propon di scambiâ la nestre sovranitât e la sigurece dai citadins sore un scont su lis boletis. Invidin citadins e aministradôrs dal teritori a tignîsi in vuaite parcè che, a partî di vuê, o savin che il risi al è une vore alt”.
Nessun commento:
Posta un commento