Publicade intal numar di mai dal periodic Ladins dal Friûl (dispunibil ancje online su http://www.ladinsdalfriul.eu) la letare di Marie Julie Pevere, la fie di un operari metût in mobilitât de fabriche “Ceramiche Girardi” di Palaçûl.
E scrîf Marie Julie:
“O vorès, a traviers cheste letare, riclamâ la atenzion di ducj, politics e no, sul câs des “Ceramichis Girardi” (viôt “Ladins dal Friûl” n.3 Març 2010 n.d.r.) e su dutis chês altris aziendis che, permetêtmi il tiermin, a son daûr a sierâ cence che nissun al loti, cence che nissun al fasi presint ai nestris politics lis tantis promessis fatis intai confronts di ducj chei lavoradôrs, cumò a cjase par vie che a son restâts cence lavôr.
E fevele une fantate che ogni dì e scugne afrontâ une societât che no si impegne par cirî di integrâ lis personis che par disfortune cumò a son a cjase, daspò che la aziende dulà che a lavoravin di agns in ca, viodude aromai come la seconde cjase, e à scugnût sierâ fasint mil impromissions ai lavoradôrs; une societât che no da la pussibilitât a personis che a son parsore dai 50 agns di rivâ insom ae lôr trate lavorative, cussì di podê cuistâ la suspirade pension, e je injuste e arogant parie.
Mi vergogni. Mi vergogni di ducj chei che a àn imprometût ai lavoradôrs des Ceramichis Girardi che ju varessin judâts, che la aziende e varès dal sigûr tornât a vierzi, che a saressin tornâts cence altri a vore; mi vergogni di ducj chei che no dan une pussibilitât a une persone come gno pari, cuntune lungje esperience, di podê lavorâ e a continuin a sbatii lis puartis in muse, une daûr chê altre, par colpe de etât.”
Lait a lei dute la letare intai coments.
