IL PD REGJONÂL DAL FVG AL CJAPE POSIZION CUINTRI IL NUCLEÂR E LA PRIVATIZAZION DE AGHE

Te ultime direzion regjonâl dal Partît Democratic che si è davuelte lunis ai 21 di març al è stât fat bon il document elaborât di bande de comission vuidade di Ezio Beltrame e presentât tant che contribût programatic pe riforme de sanitât regjonâl e chel cun rivuart aes infrastruturis elaborât di bande dal forum dal conseîr regjonâl Brandolin. Daspò de relazion de segretarie regjonâl Debora Serracchiani discussion e aprovazion ancje par doi ordins dal dì che e impegnin il partît regjonâl a supuartâ lis resons dai referendum in favôr de aghe publiche e cuintri il nucleâr.
Votade ancje la gnove segretarie regjonâl compueste di Rino Battocletti, Vittorino Boem, Silvia Caruso, Paolo Coppola, Luigi Cortolezzis, Miriam Davide, Carmen Galdi, Fabio Gri, Antonella Grim, Renzo Liva, Diego Moretti, Cristina Nazzi, Fabio Omero, Giorgia Polli, Renzo Travanut (coordenadôr politic), Stefano Ukmar e Fabrizio Venier.

SUCÈS A TISANE PE INIZIATIVE DAL PD CUN FANTIN E SERRACCHIANI SUL TEME DAL LAVÔR

I circui de Basse Ocidentâl dal Partît Democratic e an fat il plen al Polifunzionâl di Tisane li che plui di 130 personis e an partecipât al incuintri public sul teme da lavôr e dal disvilup locâl. Dopo le introduzion dal segretari dal Pd di Tisane Luca Abriola, Carlos Corvino e Riccardo Cicuttin e an presentât dôs relazions une vore interessantis: la prime une analisi statistiche e no dome sul marcjât dal lavôr a plui livei, nazionâl, regjonâl e locâl e la seconde cuntune schirie di solecitazions sul rûl propositîf che e podaressin vê i ents locâi e in particolâr i comuns rivuart il guvier dal teritori e la creazion di oportunitâts. I stimui e son stâts tirâts su ae grande sedi dal candidât sindic pal centri çampe Orlando Fantin - che al a ilustrât ai presints ideis e propuestis programatichis pal disvilup di Tisane e dal teritori - sedi de segretarie regjonâl dal Pd Debora Serracchiani che, cuntun intervent une vore preseât, e a spaziât dal livel european aes problematichis talianis e de nestre Regjon. Orlando Fantin al à pontât il dêt ancje su lis divisions dal centri drete a Tisane, marcant il fat che intant che il centri çampe al continue a presentâ lis sôs propuestis su plan regoladôr, coesion sociâl, politichis pal lavôr e v.i. di che altre bande al è un cidinôr impressionant: ancje par chest e je bielzà partide la domande di organizâ un confront public tra i candidâts par un confront trasparent e tal merit des ideis e dai programs.
Ae fin ancje diviers intervents e contribûts di bande dal public e dibatit interessant e vivarôs.

la foto e je cjolte sul sît http://www.latisana.it

IL LABIRINT DAI REFUDONS: ORIENTÂSI JENFRI PROBLEMATS LOCÂI, INOVAZION TECNOLOGJICHE E CONSENS SOCIÂL

Miercus ai 30 di març 2011, aes 14.15 - Palaç Torriani, Udin
Cunvigne sul teme
IL LABIRINT DAI REFUDONS: ORIENTÂSI JENFRI PROBLEMATS LOCÂI, INOVAZION TECNOLOGJICHE E CONSENS SOCIÂL
PROGRAM DAI LAVÔRS
/ 14.15
Regjistrazion e cafè di benvignût
/ 14.45
Introduzion
Giovanni Claudio Magon - Confindustrie Udin
/ 15.00
Prime Part – Dâts
I flus di refudons e lis dibisugnis di implants te Regjon FVG
Beatrice Miorini - Sezion Regjonâl dal Catast dai refudons - ARPA FVG
/ 15.20
Seconde Part – Tecnologjiis
Termovalorizadôrs - tecnologjiis e esperiencis positivis in Italie: lûs e ombris
Paolo Centola - Politecnic di Milan
Dispersion dai refudons organics tes fognaduris: parcè sì parcè no
Franco Cecchi - Universitât di Verone
Implants di smaltiment: cuale vision tal plan Regjonâl dai refudons?
Giovanni Petris - Diretôr Centrâl Ambient e energjie Regjon FVG
/ 16.45
Tierce part – Consens sociâl
Legambiente - Esistial un ambientalisim costrutîf?
Michele Bernard - Legambiente FVG
Ce rûl pe Provincie tal prossim futûr?
Enio Decorte - Assessôr al Ambient de Provincie di Udin
Case history: ricualificazion artistiche di centrâl di cogjenerazion pal teleriscjaldament a Banchette d’Ivrea
Giorgina Bertolino - Associazion Culturâl a.titolo -Turin
Moderadore
Claudia Silvestro - Responsabile Ambient Confindustrie Udin
/ 17.45
Dibatit
/ 18.15
Conclusions
Adriano Luci – President Confindustrie Udin

Par informazions contatâ Confindustrie Udin
Palaç Torriani, Largo Carlo Melzi - Udin
Tel. 0432276203 - ambiente@confindustria.ud.it
La partecipazion e je gratuite, ma e ven domandade la iscrizion on line al sît
www.confindustria.ud.it/convegni/ dentri di lunis ai 28 di març

FIESTE DAL FRIÛL TE BASSE FURLANE

In ocasion dal 3 di Avrîl, aniversari de nassite dal Stât Patriarcjâl furlan, e je stade metude adun dai comuns di Cjarlins, Muçane e Sant Zorç, la Fieste dal Friûl te basse Furlane.

Il program:
JOIBE ai 24 di Març a Muçane
Inte Biblioteche aes 15.00 pe scuelis primariis e aes 16.00 pe scuele de infanzie
"Storiutis. La pavee, il pessut e la ruie" di Debora Crapiz e Doriana Alessio
VINARS al 1 di Avrîl a San Zorç di Noiâr
Intal Auditorium San Zorz aes 20.45
"Il condot intal ort" comedie teatrâl cun la "Buine blave di Mortean"
SABIDE ai 2 di Avrîl a Muçane
Inte sale dal ricreatori "San Vitale" aes 10.30
"Zovins furlans in musiche" - Conciert dai Luna e Un Quarto e DJ Tubet e presentazion de mape ilustrade "Friûl di Magance" di Luigino Peressini.
DOMENIE ai 3 di Avrîl a Cjarlins
Aes 11.00 Sante Messe par furlan inte glesie parochiâl di Cjarlins
Aes 12.00 Corteu cu la partecipazion de Gnove Bande di Cjarlins e deposizion di rosis tal monument ai muarts in vuere par cure dal grop alpins di Cjarlins.
Aes 12.15 Inte sale parochiâl: presentazion dal librut "La Clape 2011" e cerimonie di consegne dal premi "Britule di Arint" par cure de Clape culturâl di Cjarlins e Sarvâs

LOTIS DAL CORMÔR: TORNÂ A CONTÂ PAR NO DISMENTEÂ

guerrino cecotti

i luna e un quarto

le sale plene dal auditorium S. Vitale

“La primevere dal 1950, la miserie e la emigrazion, il plan pal lavôr e il grant siopar contrari sul Cormôr. Comizis cun miârs di personis a jemplâ lis placis, sindacaliscj ex-partigjans a traviersâ lis stradis de Basse in biciclete, i zovins, lis assembleis dai zornadîrs. Une lote deventade event politic e sociâl di enorme impuartance pal teritori de Basse e pal mont dal lavôr furlan in gjenerâl. Tornâ a contâ par no dismenteâ.”

Il prin apontament de rassegne Anpi “Resistenze 2011”, dedicât aes Lotis dal Cormôr dal 1950, al è stât un sucès al di là des sperancis. Cirche 150 personis e an jemplât l’auditorium S. Vitale di Muçane mostrânt che la memorie dai oms e des feminis dal Cormôr e je inmò vive. Dopo la introduzion di Lorenzo Fabbro, Adriano Venturini al à presentât un straordenari e comovent video-documentari realizât di Radio Onde Furlane montant lis intervistis ai protagoniscj tiradis sù dilunc dal an passât (60° inovâl des Lotis). Bielissimis ancje lis musichis dai Luna e un Quarto (simpri plui brâfs) e lis leturis dal poete Maurizio Mattiuzza che e an compagnât i presints intun viaç penç di storiis e sintiments. Lis peraulis di Giancarlo Velliscig e la vôs sflandorose di Alessandra Kersevan e an scjaldât i presints che però il batimans plui lunc a lu an regalât a Guerrino Cecotti, l’ultin dirigjent des Lotis dal Cormôr che, rivât dongje dai otante, nol à pierdût dal sigûr ni il snait ni la grinte di chei agns. Cristian Sedran, assessôr dal comun di Muçane che al à sigurât il patrocini de iniziative, al à consegnât un presint tant che segn di ricognossince a Bertuzzi Achille, Brotto Bruno, Cecotti Guerrino, Cudini Rino, Galasso Fanny, Tollon Felice, Andrian Gastone, Mian Mario, Bragagnolo Angela, Alfredo Zaina, Del Piccolo Sante e a Anna Graziutti, fie dal mitic Franco Graziutti “Pablo”. Ultin ricognossiment ae memorie di Ernesto Tartaro, che nus a lassâts sabide stât, e par finî la conclusion cuntune fantastiche e liberatorie “Bella Ciao” cjantade di dute la sale e che e someave no volê finî plui……

Fracait chi par viodi cualchi foto in plui.

RIVOLUZIONS ARABIS: MEDITERANI, CAMBIAMENTS E DEMOCRAZIE

Vinars ai 25 març, aes 20.30, alì de CGIL in vie Bassi 36, Udin
RIVOLUZIONS ARABIS: MEDITERANI, CAMBIAMENTS E DEMOCRAZIE
Incuintri public cun Roberto Musacchio, deputât european dal 2004 al 2009, Adel Jabbar, sociolic e sagjist e Majda Badaoui, esperte di mediazion culturâl.
Introduzion di Abdou Faye, CGIL FVG e coordenament Franca Gallo, FLC Cgil Udin.

”Al mondo vi sono ancora esseri umani disposti a morire per la dignità, la giustizia e la libertà. E un giorno forse anche per l'uguaglianza.”

COMITÂT PE AUTONOMIE E PAL RILANÇ DAL FRIÛL E COMITÂT 482: POLITICHIS PAL FURLAN, LA SITUAZION E JE GRIVIE, LIS RESPONSABILITÂTS CLARIS

Dopo lis iniziativis (1 - 2) dal Partît Democratic rivuart ai inadempiments de aministrazion regjonâl di centri drete in riferiment aes politichis linguistichis pal furlan e ae mancjade aplicazion de Leç Regjonâl 29/2007 lis critichis e son stadis ribatudis, dilunc di une conference stampe inmaneade martars stât intal palaç de regjon a Udin, ancje di doi sogjets impuartants tant che il Comitât pe Autonomie e il rilanç dal Friûl e il Comitât 482. Par restâ in argoment lait a lei ca un intervent di Lorenzo Fabbro, component de segreterie provinciâl dal Pd, che al interven in particolâr sul cantin de presince de lenghe sui media e sul contrat di servizi rai e ca la notizie di une interpelance presentade dal conseîr regjonâl dal Pd Mauro Travanut in riferiment ae propueste, une vore preocupante, di stravuelzi la impostazion de Arlef midiant modifichis al statût che e proviodin di trasferî il podê di indreçament des politichis linguistichis dal Comitât Tecnic Sientific (organisim formât di esperts) al Consei di Aministrazion (organisim di nomine politiche direte) cul risi di incressi inmò di plui il podê discrezionâl dai politics inte programazion e intal finanziament dai progjets pal furlan.

DEBORA SERRACCHIANI E ORLANDO FANTIN A TISANE: LAVÔR E OCUPAZION: CUÂL RÛL PES AMINISTRAZIONS LOCÂLS

I circui dal Partît Democratic de Basse Ocidentâl us invidin a partecipâ al incuintri public sul teme "Lavôr e ocupazion: cuâl rûl pes aministrazions locâls" che si davuelzarà martars ai 22 di març 2011, aes 20.30, te sale otagonâl dal Centri Polifunzionâl di Vie Goldoni a Tisane. Dopo de esposizion e de analisi dai dâts statistics cun rivuart al marcjât dal lavôr regjonâl e locâl Debora Serracchiani, europarlamentâr e segretarie regjonâl dal Pd e Orlando Fantin, candidât sindic pe coalizion di centri çampe aes elezions comunâls a Tisane e proponaran struments e strategjiis par agjevolâ il disvilup socio economic dal teritori.

PRIME JESSUDE PUBLICHE A PALAÇÛL PE CANDIDADE SINDIC MANUELA ROMANO

Prime jessude publiche de candidade a sindic di Palaçûl Manuela Romano che e varà il sostegn di dôs listis civichis. Intant intal cjamp dal centri drete Leghe e Pdl fin cumò no an rivât a cjatâ un acuardi e la conferme de candidature dal leghist Mauro Bordin inmò no rive.

LIS LOTIS DAL CORMÔR: TORNÂ A CONTÂ PAR NO DISMENTEÂ

LA MEMORIE, DOPO LA LIBERAZION LIS LOTIS PAL LAVÔR:

1950/2010 60° ANIVERSARI DES LOTIS DAL CORMÔR

Sabide ai 19 di març 2011, aes20.15, li de Sale dal Ricreatori S. Vitale a Muçane

Introduzion di Lorenzo Fabbro e Adriano Venturini, videointervistis ai protagoniscj, leturis di Maurizio Mattiuzza e incursions musicâls dai Luna e Un Quarto e di Giancarlo Velliscig e Alessandra Kersevan. Cun le partecipazion di Guerrino Cecotti.
“La primevere dal 1950, la miserie e la emigrazion, il plan pal lavôr e il grant siopar contrari sul Cormôr. Comizis cun miârs di personis a jemplâ lis placis, sindacaliscj ex-partigjans a traviersâ lis stradis de Basse in biciclete, i zovins, lis assembleis dai zornadîrs. Une lote deventade event politic e sociâl di enorme impuartance pal teritori de Basse e pal mont dal lavôr furlan in gjenerâl. Tornâ a contâ par no dismenteâ.”

par cure di: anpi intercomunâl di palaçûl, comun di muçane, associazion artetica, circul trois, radio onde furlane, spi cgil, auser turgnano e stella&tagliamento.

LABORATORI MUZANE: SABIDE IN PLACE PE AGHE PUBLICHE

Sabide ai 19 di març il grup di Laboratori Muzane al sarà in place Sbaiz a Muçane, des 9 aes 12,30, cuntun bancut dulà che si cjatarà materiâl informatîf e al sarà pussibil poiâ la campagne referendarie pe aghe publiche cuntune piçule donazion.

CONVOCADE LA ASSEMBLEE REGJONÂL DAL PD PAR LUNIS AI 21 DI MARÇ

Il president Tarcisio Barbo al a convocât par lunis ai 21 di març, a lis 20.30, alì de sede dal Partît Democratic in Vie Joppi 63 a Udin la Assemblee Regjonâl dal PD dal Friûl-Vignesie Julie.
Ca sot l'ordin dal dì:
- Relazion de segretarie
- Aprovazion dal document infrastruturis (relazion dal conseîr regjonâl Giorgio Brandolin)
- Adeguament dal statût regjonâl rispiet aes osservazions de comission nazionâl di garanzie e aes modifichis al statût nazionâl
- Comunicazions de segretarie
- Variis e eventuâls